Kəşfiyyatçılarımız fevralda necə pusquya düşüb? - Xainlərin Azərbaycan vurduğu zərbələr
"Atlas" Araşdırmalar Mərkəzinin rəhbəri, politoloq Elxan Şahinoğlu Dövlət Təhlükəsizliyi Xidmətinin rəisi Mədət Qulyevin mətbuata verdiyi açıqlamaya münasibət bildirib. GoldNews.Az xəbər verir ki, siyasi şərhçi özünün sosial şəbəkədəki hesabında bunları qeyd edib:
"Dövlət Təhlükəsizliyi Xidmətinin rəisi Mədət Quliyevin “orduda mövcud olan xəyanətkar şəbəkə 1988-1990-cı illərdə kök atıb” açıqlaması o deməkdir ki, Azərbaycanın müstəqilliyindən bu yana Dağlıq Qarabağ uğrunda savaşda məxfi hazırlanan planlardan silahlı birliklərimiz və sonrakı illərdə formalaşan ordumuz hələ hücuma keçmədən Rusiyanın və Ermənistanın xəbəri olub. Xəyanətkar şəbəkədə onlarla satqın olub. Onların uzaq 1990-cı illərin başlanğıcında Daşaltı əməliyyatından tutmuş, Şuşa və Laçındakı uğursuzluqlarımızda və ən son fevralda kəşfiyyat qrupmuzun pusquya düşərək itkilərimizdə “xidmətləri” ola bilər. Yəni sən hansısa əməliyyat planı hazırlayırsan, hələ əməliyyata başlamış xəritələrin sürəti düşmənlərimizin əlinə keçə bilərmiş. Xəyanətkarların üzə çıxmasından sonra bunun belə olmadığını kim iddia edə bilər? Bu hələ bildiklərimizdir. İstənilən yüksək rütbəli hərbçinin Rusiya ilə gizli əlaqələri onun avtomatik Ermənistana işləməsi mənasına gəlir.
Qeyd edək ki, DTX şefi Mədət Quliyev mətbuata açıqlamasında kənardan Azərbaycana böyük təhdidlər olduğunu bildirib. O, qeyd edib ki, Azərbaycan çox təhlükəli bir məkanda, Qərbə Şərqin qovşağında yerləşir: "Təbii ki, kənardan Azərbaycana qarşı hər cür təhdidlər var. Amma onu da deməliyəm ki, bu təhlükəni Müdafiə Nazirliyinin özü aşkarlamışdı, artıq istintaq qrupu fəaliyyət göstərir. Prezidentimiz tərəfindən baş prokuror Zakir Qaralova lazımi tapşırıq verilib, istintaq qrupu araşdırma aparır. Sadəcə, onlar bir günün, beş günün casusları deyil. Bu xəyanətkar şəbəkə 1988-1990-cı illərdən kök atıb. Bu, Müdafiə Nazirliyinin rəhbərliyi, prezidentin tapşırıqlarının düzgün icrasının nəticəsidir ki, bu xəyanətin üstü açılıb. İstintaq məsələyə öz qiymətini verəcək".
