Bakıda endirimli “Qızlıq pərdəsi” əməliyyatları edən həkim geri addım atdı - FOTOLAR
Ötən gün Azərbaycanda bakirəliyini itirən qızlara açıq-aşkar çağırış edərək, onların bakirəliyinin yenidən bərpa edilə biləcəyi barədə reklamlar yayan bir sayt açıldığı barədə məlumat vermişdik.
GoldNews.Az xəbər verir ki, bu günlərdə cərrah, mama-ginekoloq Ramilə Abbaszadə bu və digər əməliyyatları keçirmək üçün doctorramila.az adlı saytını yaratmışdı. Mətbuatın məsələni işıqlandırmasından sonra, ötən gün axşam saatlarından etibarən saytın fəaliyyəti dayandırılıb.
Artıq, internet istifadəçiləri həmin sayta daxil olmaq istədikdə, "Sayt texniki xidmətə bağlanıb. Zəhmət olmasa bir qədər sonra gəlin" yazısı qarşılarına çıxır.
Qeyd edək ki, sayt barədə ilk məlumatı oxu.az xəbər portalı yayıb. Portal qeyd edir ki, Azərbaycanda bu problemləri aradan qaldırmaq üçün əvvəllər gizli şəkildə həkimlərə müraciət olunurdusa, artıq himenoplastika əməliyyatı açıq-aşkar həyata keçirilir.
Saytda himenoplastikanın qiyməti, əməliyyatdan əvvəl və sonrakı bütün prosedurlar barədə məlumatlara yer ayrılıb.
Qeyd edilir ki, əməliyyatlar uzunmüddətli və ya üçgünlük olur. Həmçinin, saytda hər iki əməliyyatdan sonra cinsi əlaqə zamanı qanın normadan artıq olması, əməliyyatın xüsusi texnika ilə aparılması və əməliyyat zamanı müasir sovrulan incə saplardan istifadə edilməsi barədə məlumatlar var.
Bildirilir ki, əməliyyatın izləri hətta peşəkarlar üçün də görünməz şəkildə olur və əməliyyata 100 faiz zəmanət verilir.
Məsələni daha dərindən öyrənmək üçün saytda yer alan nömrələrlə əlaqə saxladıq. Özünü Oxu.Az-a Ramilə Abbaszadənin köməkçisi kimi təqdim edən Elnarə adlı şəxs qeyd olunan məlumatları təsdiqlədi:
“Əməliyyatlarımızın hamısının zəmanəti var. Ömürlük ediriksə, ömürlük zəmanət, üç günlükdürsə, üç gün zəmanət veririk. Əgər toyunuz ay yarım sonradırsa, ömürlük bakirəlik əməliyyatı etdirməlisiniz, yox, əgər on gün sonradırsa, üçgünlük əməliyyat etdirmək lazımdır. Üçgünlük zəmanət müddəti olan əməliyyatın qiyməti 500 manat, ömürlük olanın qiyməti isə 1000 manatdır”.
Qeyd edildi ki, əməliyyatlar iki xəstəxanada həyata keçirilir:
“Əməliyyatlarımız Əhmədlidə Diaqnostika Mərkəzində və Bakıxanovda “Stimul” Hospitalda reallaşır. Əməliyyata girməmişdən bir gün öncə qəbula yazılmaq lazımdır. Ayın 10-u toyundursa, doqquzu, ya da səkkizi əməliyyat edə bilərik”.
Məlumat üçün bildirək ki, sözügedən əməliyyatlar Türkiyədə 900 və 2700 manat arası dəyişir. Bu əməliyyat üçün Türkiyəyə gedən vətəndaşlarımızın sayı da az deyil. Onların bu addımı isə həkimlərin daha yaxşı və peşəkar olması ilə əlaqədardır.
