Azərbaycana qələbə sevincini yaşadan Mahir Mədətov: "Qol vuran an fikirləşdim ki..."

UEFA Çempionlar Liqasının play-off mərhələsi çərçivəsində ilk oyununu keçirən “Qarabağ” qələbə qazanıb. Oyunda yeganə qolun müəllifi olan Mahir Mədətov UEFA-nın versiyasına görə matçın ən yaxşısı seçilib.

GoldNews.Az xəbər verir ki, “Qarabağ”ın hücumçusu oyunsonrası açıqlamasında qol vurmağını yaxşı sürpriz adlandırıb:

"Açığı, özümü üçün də sürpriz oldu. Amma yaxşı sürpriz oldu. Qol vuran zaman bir anlıq fikirləşdim ki, ofsayd da ola bilər. Amma yan xətt hakiminin meydanın mərkəzini göstərdiyini gördüm. Bu cür uğura nail olduğuma görə sevinirəm. Lakin hər şey həll olunmayıb. Ən azı iki topla qələbə qazansaydıq, yaxşı olardı. Çünki 1:0 hesabı bir qədər sürüşkəndir. İstənilən halda, hesab arasındakı fərq böyük olsaydı belə, arxayınlaşmaq, boşalmaq olmazdı. Hələ qarşıda cavab oyunu var. Bu matça da yaxşı hazırlaşmalıyıq. Çətin olacağı aydındır. Rəqibin üstünlüyü azarkeşləri olacaq. Biz də mərhələ adlamaq üçün əlimizdən gələni edəcəyik. Tarix yazmaq üçün gücümüzü səfərbər edəcəyik. Rəqibimizin adı, gücü ortadadır"./Goal.az