Ermənilərin qətlə yetirdiyi azərbaycanlı uşaqlar - ADLAR VƏ FOTOLAR

Düşmən yenə də öz gerçək xislətini göstərdi və ötən gecə erməni təxribatı nəticəsində 2 yaşlı Zəhra öldürüldü. Bu, düşmənin etdiyi ilk belə azyaşlı qətliamı deyil. Yəni 1988-ci ildən bu tərəfə erməni dığaları körpə, qadın, qoca demədən vətəndaşlarımızı ağır işgəncələrlə qətlə yetirib. Ancaq onların arasında ən məsumu da, günahsızı da körpələr olub.

GoldNews.Az son dövrlərdə erməni qaniçənlərinin öldürdüyü məsum körpələri sizə təqdim edir.

2011-ci ilin mart ayında 8 yaşlı Fariz Bədəlov öldürülüb. Martın 8-də Azərbaycanın Ağdam rayonu ərazisində erməni snayperindən açılan atəş nəticəsində Fariz qətlə yetirilib.

2011-ci ildə iyulun 17-də 13 yaşlı Şahmalıyeva Aygün Zirəddin qızı düşmən tərəfindən qətlə yetirilib. İyulun 14-də Tovuz rayonunun Ermənistanla həmsərhəd olan Əlibəyli kəndində partlayıcı qurğunun işə düşməsi nəticəsində 1998-ci il təvəllüdlü Şahmalıyeva Aygün Zirəddin qızı həlak olub. Partlayıcı qurğu quraşdırılmış “itəbənzər” uşaq oyuncağı Ermənistan tərəfindən Əlibəyli kəndi ərazisindən keçən Tovuz çayına buraxılıb. Həmin ərazidə oynayan Cəfərov Elsəvər Həsən oğlu və Şahmalıyeva Aygün Zirəddin qızı oyuncağı taparaq Cəfərov Həsənin evinə gətiriblər. Evdə oynayan zaman A. Şahmalıyeva oyuncağı masanın üstünə vurub, nəticədə partlayış baş verib.

2016-cı ilin aprelin 5-də Erməni Silahlı Qüvvələrinin atəşkəsi pozması nəticəsində Tərtər rayonunun Həsənqaya kənd sakini, 16 yaşlı Həsənova Turanə Kamandar qızı dünyasını dəyişib.

Dünən axşam saatlarında düşmən təxribatı nəticəsində Füzuli rayonunun Alxanlı kənd sakini, 2 yaşlı Zəhra Quliyeva həlak olub.

Allah rəhmət eləsin!