28 apreldə Azərbaycan bir daha işğal olunacaqmı?
28 aprel Moskvada Ermənistan və Azərbaycan xarici işlər nazirlərinin baş tutacaq görüşünə Ermənistan tam üstün bir tərəf kimi gedir. İlkin olaraq görüşdən imtina, tam bir saymamazlıq reveransları, sonda “ Məşədinin xatirinə” –Rusiyanın inciməməsi üçün görüşə razılıq verdiklərini açıq söyləyib tam bir arxayınlıqla Moskvaya gedirlər. Erməni yazır: “Azərbaycan bilir ki, Ermənistan heç bir güzəştə getmir, ona görə də bu görüş bizim üçün mənasızdır” və əlavə edir ki, “ yəqin Azərbaycan hansısa güzəştə razılığı barədə informasiya daxil olub , ona görə görüşə razılıq verilib”. Ermənistan Azərbaycanın nəyi güzəştə gedəcəyini düşünə bilir? Aydındır , Qarabağı! Aprel döyüşləri deyib, az qala Xankəndinə bayraq sancmışıq kimi “qürrləndiyimiz” hadisələrin strateji sonucu budur. Apreldən sonra Azərbaycan tərəfi heç bir diplomatk uğur qazanmayıb. Ermənistan isə əleyhinə işləmiş situasiyadan karlı çıxmağı bacardı.
E.Məmmədyarov status- kvo ilə razılaşmadıqlarını tez-tez deyir. Status-kvo dəyişə bilər, amma necə? Nazir bunu niyə sonuna qədər açıqlamır? 1999-cu ilin sentyabrında da Cenevrədə Koçaryanla görüşdən əvvəl Qarabağın güzəşt edilməsi Azərbaycan Təhlükəsizlik Şurasında müzakirə olunub. Bir ay ərzində öncə Vəfa Quluzadə, bir ay sonra Tofiq Zülfüqarov və Eldar Namazov istefa verdilər. Bu təsadüfi istefalar deyildi. Bir qəzet Cenevrə görüşündən bir gün əvvəl:” Ay camaat, Qarabağı verirlər” manşetilə çıxdı. Böyük rezonans yarandı. İndi Qarabağla əlaqədar görüş keçiriləcək. Zəhmət çəksin nazir mətbuata açıqlama versin, erməni mətbuatını yalanlasın, desin ki, biz tərəfdən heç bir güzəşt müzakirələri aparılmayacaq, Azərbaycan vətənin ( ərazinin yox, Qarabağ ərazi deyil, vətəndir!) bir qarış torpağını da güzəştə getməyəcək, heç bir şərt altında işğal edilmiş Azərbaycan torpaqlarının Ermənistana birləşdirilməsinə və ya torpaqlarında ikinci erməni dövlətinin yaranmasına imkan verməyəcək. “Ermənistana birləşdirilməsinə” terminini də xüsusi vurğulamaq lazımdır, çünki rəsmilərimiz adətən “ikinci erməni dövlətinin yaranmasına” imkan verilməyəcək deyir. Ermənilər də deyəcəklər ki, ikinci dövlət yaratmırıq, birləşdiririk.
Qayıdaq 28 aprel görüşünə. Bu görüşün proloqu o qədər alçaldıcıdır ki, epiloqun faciəvi bitməyəcəyinə inam azdır. Belə deyilsə,( inanaq ki, belə deyil) görüşə getməzdən əvvəl nazirlik Azərbaycan xalqının, Qarabağ camaatının narahatlığını nəzərə alıb açıqlama versin, erməni siyasilərin güzəşt müzakirələrini yalanlasın.
İlham İsmayıl, siyasi analitik
