Hərbi əməliyyatlar başlayacaq və Ordumuzu heç kim dayandıra bilməyəcək - AÇIQLAMA
İyul ayının 4-də ermənilər əsl xislətlərini bir daha nümayiş etdirərək, Füzuli rayonunun Alxanlı kəndini 82 və 120 millimetrlik minaatanlardan və dəzgahlı qumbaraatanlardan atəşə tutdular və iki dinc sakini qətlə yetirdilər. Bundan 3 gün sonra Azərbaycan Müdafiə Nazirliyi məlumat yayaraq Alxanlı kəndində həlak olan dinc sakinlərin qisasının alınması üçün iyulun 7-də Azərbaycan Silahlı Qüvvələrinin Ermənistan ordusunun döyüşə hazırlıq vəziyyətinə gətirilən qüvvələrinə, xüsusilə də taborun müdafiə rayonunda yerləşən seçilmiş hədəflərinə dəqiq atəş zərbələri vurduğunu açıqladı.
Bildirildi ki, cəbhənin Füzuli-Xocavənd istiqamətindəki qoşunlarımızın həyata keçirdiyi bu fəaliyyət nəticəsində, ilkin məlumata görə, düşmənin tabor mərkəzinə daxil olan bölmələrin xeyli canlı qüvvəsi məhv edilib, bir neçə döyüş texnikası tamamilə sıradan çıxarılıb və digər hərbi infrastruktur obyektləri dağıdılaraq bərpa olunmaz vəziyyətə salınıb.
Qeyd etdiyimiz sonuncu hadisədən 3 gün keçib və nazirliyin yaydığı xəbərlərdən də aydın olur ki, artıq cəbhədə müəyyən qədər nisbi sakitlik hökm sürür.
Belə olan halda ortaya çıxan əsas sual ondan ibarətdir ki, Ermənistan ordusu Azərbaycanın iki dinc sakinini niyə qətlə yetirdi, bununla nə əldə etmiş oldu və baş verən bu insidentin elə həmin gün Füzuli rayonunun Aşağı Veysəlli kəndinin yaxınlığında yerləşən qoşunların təmas xəttində baş verən monitornqlə eyni günə düşməsi təsadüfdürmü?
Bütün bu prosesləri və cəmiyyəti düşündürən bir sıra sualları GoldNews.Az-a şərh edən hərbi ekspert Üzeyir Cəfərov bildirdi ki, ermənilərə Alxanlıda törətdikləri vəhşiliklər onlara hələ çox başağrısı gətirəcək. Ekspertin sözlərinə görə, ermənilər bu əməlləri ilə əslində heç nəyə nail olmayıblar, əksinə gözləmədikləri vəziyyətlə üz-üzə qaldılar:
"Bu gün faktiki olaraq biz müharibənin bir addımlığındayıq. Genişmiqyaslı hərbi əməliyyatların başlayacağını düşünməsəm də, lokal xarakterli istənilən əməliyyatlar başlaya bilər və bunu Azərbaycana heç kim qadağa qoya bilməz. Çünki ermənilər mülki vətəndaşlara qarşı Cenevrə konvensiyasının tələblərini kobud şəkildə pozublar. İndi artıq top Azərbaycan tərəfdədir. Əgər ermənilər yenə təxribat törətsələr, bu dəfə Azərbaycan Ordusunu heç kim dayandıra bilməyəcək".
Ekspert qeyd etdi ki, hadisədən sonra xarici ölkələrin dövlətimizdəki hərbi attaşeləri özləri də əmin oldular ki, ordumuzun Alxanlıda heç bir hərbi bazası və mövqeyi yoxdur:
"Artıq Azərbaycan Silahlı Qüvvələri tam hazır vəziyyətdədir. Ölkə rəhbərliyi qərar qəbul edəcəyi təqdirdə, düşmənin həm cəzalandırılması, həm də də qisas əməliyyat həyata keçiriləcək. Mənə elə gəlir ki, o günkü qisas əməliyyatının davamı olacaq. Çünki proses belə davam edə bilməz. Fransa parlamentariləri, ingilislər özləri, Rusiya höküməti başa düşürlər ki, Dağlıq Qarabağ məsələsi ilə bağlı artıq konkret addımlar atılmalıdır. Atılmayacağı təqdirdə, vəziyyət nəzarətdən çıxa bilər. Bu dəqiqə məsələ o istiqamətdə gedir ki, artıq Azərbaycan düşməni cəzalandıracaq".
Hadisənin məhz iyul ayının ilk ongünlüyündə baş verməsi təsadüfdürmü, yoxsa bunun hansısa səbəbləri var?
- " Sabah Avstriyada iki ölkənin xarici işlər nazirləri görüşəcəklər və bu görüş üçün mövzu lazımdır. Bu görüşə ATƏT-in Minsk qrupunun həmsədrləri də qatılacaq. Ən əsası isə Ermənistanın ötən ildən Avstriyada və Rusiyada keçirilmiş görüşlərdən sonra ATƏT-in Minsk qrupunun qarşısında iki ölkənin prezidentlərini bir araya gətirmək kimi öhdəliyi var. Bu proses ermənilərdə hələlik alınmadığına görə, bunlar çalışırlar ki, daha çox qan tökülsün və qan töküləcəyi təqdirdə iki ölkənin prezidentləri bir araya gələcəklər, amma nə olur-olsun Azərbaycan bu dəfə düşmənə əvvəlki şansları tanımayacaq. Əgər biz indiyə qədər Rusiyanın və beynəlxalq qurumların çağırışını eşidirdiksə, bu dəfə bu baş verməyəcək".
ATƏT-in Minsk Qrupu təmas xəttində monitorinq keçirdi və bundan bir neçə saat sonra məlum hadisə baş verdi. Sizcə, bunlar Ermənistana "dobro" vermiş ola bilərlərmi?
- "Mən buna tam əminəm ki, həmin günlərdə baş verən hadisələr biləvasitə ATƏT-in Minsk Qrupunun xeyir-duası ilə olub. Onlar Füzulinin digər bir kəndində - Aşağı Veysəllidə monitorinq keçirib evlərinə çatmamış bu hadisə baş verdi. İndi insanlar bu baş verənlərdən necə şübhələnməsinlər? Mən özüm onların şəxsi nümayəndəsi Anjey Kaspşikdən çox şübhələnirəm və ondan çox narazıyam. Çünki onlar son hadisədən sonra heç dünyasını dəyişənlərin ailələrinə də başsağlığı vermədilər. Bu nədən xəbər verir? Amma bir erməni cavab atəşi ilə məhv edilən kimi narahatlıqlarını ifadə etməyə başlayırlar".
İki gün əvvəl müdafiə nazirimiz Zakir Həsənov cəbhə xəttinə yollandı və Zəhranın məzarını da ziyarət etdi, həmçinin hərbçilərimizlə də görüşüb. Sizcə nazirin bu səfərinin baş verənlərlə hansısa formada əlaqəsi varmı? Yəni Zakir Həsənov ordumuza döyüşə hazır olmaq barədə əmr vermək üçün cəbhəyə getmiş ola bilərmi?
- "Düşünmürəm ki, nazir bu vəziyyətlə əlaqədar cəbhəyə getmişdi. Onsuzda o, hər həftə cəbhəyə yollanır. Ona görə də burada hansısa tapşırıq və məqsəd axtarmaq doğru deyil. Çünki Zakir Həsənov döyüş bölgəsi ilə daha çox maraqlanır və gedib-gəlir. Bu səfər sadəcə həmin gərgin ərəfəyə düşdü və nazir də insanlıq naminə dünyasını dəyişmiş balamızın məzarını yad elədi ".
