Ermənilər raketi niyə atdılar? - Aprel döyüşlərinin revanşı BAŞLAYIR? - Hərbi ekspertdən AÇIQLAMA
Bu gün Azərbaycan Müdafiə Nazirliyi (MN) məlumat yayaraq bildirdi ki, aprelin 27-də axşam saatlarında Ermənistan hava hücumundan müdafiə bölmələri tərəfindən cəbhənin Xocavənd-Füzuli istiqamətində “OSA” zenit raket kompleksindən buraxılan idarəolunan raket heç bir hədəfə dəymədən nəzarətimizdə olan ərazidə boş sahəyə düşüb.
GoldNews.Az xəbər verir ki, əraziyə baxış keçirilərək 9M33M2 tipli raketin başlıq hissəsi və digər qalıqları tapılaraq götürülüb. İlkin araşdırma Ermənistan silahlı qüvvələrinin silahlanmasında olan raketlərin köhnə və istismara yararsız olduğunu göstərib.
Bu hadisədən sonra ortaya çıxan əsas sual ondan ibarət oldu ki, Ermənistan tərəfi bu addımla cəbhədəki vəziyyəti gərginləşdirib, aprel döyüşlərinin revanşını almaq istəyir, yoxsa bunun arxasında hansısa siyasi bir proses dayanır?
GoldNews.Az-a vəziyyəti şərh edən hərbi ekspert Üzeyir Cəfərov bildirdi ki, bu sırf siyasi proseslərlə bağlıdır, arxasında hansısa hərbi maraq axtarılması düzgün deyil.
“Biliyimiz kimi rəsmi Mokvanın təşəbbüsü ilə bu gün Ermənistan Azərbaycan və Rusiya Xarici işlər nazirlərinin görüşü keçirildi və Ermənistan tərəfi əvvəlcə bu görüşdən imtina etsə də, Moskvadan gələn zəngin ardından Ermənistanın Xarici işlər naziri dərhal oraya yollandı. Ona görə də bu gün cəbhədə baş verənlər birbaşa həmin görüşlərlə bağlı məsələdir. Biz bu hadisə zamanı da gördük ki, düşmən tərəfinin əsas məqsədi diqqəti öz üzərlərinə çəkməkdir. Yəqin ki, görüş zamanı bu məsələ də gündəmə gətirilib”.
Ekspert qeyd etdi ki, əgər Ermənistan Ordusu birbaşa Azərbaycan Silahlı Qüvvələrinin mövqelərini hədəf alsaydı, o zaman mənzərə tamam fərqli olardı. Amma bu, birbaşa görüşlə bağlı məsələ olduğu üçün düşünmürəm ki, Azərbaycan Ordusu hansısa adekvat cavab tədbiri görsün. Çünki bu bir təxribatdır və düşünmürəm ki, Azərbaycan tərəfi bu təxribata uysun. Azərbaycan tərəfinin tək edəcəyi bu məsələni sakitliklə ötüşdürməkdir. Bu, əslində bizə faydalı bir məqamdır ki, ölkəmiz bu təxribata cavab vermədi. Yəqin ki, axşam saatlarda məsələ ilə bağlı narahatlıq bəyanatı da veriləcək. Onu da qeyd edim ki, bu hadisə də birbaşa Rusiyanın sifarişi idi. Görüş qapalı keçdiyi üçün bəzi təfərrüatları çox güman axşam saatlarında bəlli olacaq”.
Hərbi ekspert onu da əlavə etdi ki, hansısa narahatlığa heç bir əsas yoxdur. Çünki Ordumuzun arsenalında olan silahlar düşmən tərəfindəkindən dəfələrlə üstündür.
