“Fransanın öz xarici siyasətinə diqqət yetirməsi yaxşı olar” - Abbas Abbasov
“Fransa hökumətinin Bakı Təşəbbüs Qrupuna qarşı ittihamlar səsləndirməkdənsə, öz xarici siyasətinə diqqət yetirməsi yaxşı olar”. “Qafqazinfo” “Report”a istinadən xəbər verir ki, bunu Bakı Təşəbbüs Qrupunun icraçı direktoru Abbas Abbasov Fransanın Milli Təhlükəsizlik və Müdafiə Baş Departamenti – “VIGINUM” tərəfindən 2024-cü ilin dekabr ayında dərc olunan hesabatda əksini tapan əsassız iddialara cavab məqsədilə keçirilən mətbuat konfransında deyib. Onun sözlərinə görə, Makron hökumətinin üzərinə məsuliyyət düşür, neokolonializmə son qoymalıdırlar: “Prezident İlham Əliyev dünyada dekolonializm prosesinə ən böyük töhfə verən liderlərdəndir. Dövlət başçısının neokolonializmlə mübarizədəki qətiyyəti belə bir siyasət aparanların məkrli niyyətini ifşa edir. Ona görə də onlar belə hesabat hazırlamağa çalışıblar. Fransa beynəlxalq hüququ dəstəkləyirsə, eyni zamanda, müstəmləkəçilik siyasətini necə davam etdirir?” Abbas Abbasov onu da əlavə edib ki, “VIGINUM” əsassız iddialarla Bakı Təşəbbüs Qrupunun nüfuzuna kölgə salmağa çalışır. Onun sözlərinə görə, BTQ beynəlxalq hüququn norma və prinsiplərini əsas tutaraq fəaliyyət göstərir: “Biz neokolonializmdən əziyyət çəkən xalqların azadlıq mübarizəsinə dəstək göstəririk və göstərməyə də davam edəcəyik”.
