Qızmar günəş altında — Kəşfiyyatçılarla təlimdən reportaj - FOTOLAR
Hər gün yeni macəra, hər gün yeni məlumatlar və getdikcə ağırlaşan təlimlər.
Dünənki ağır təlimdən sonra hər kəs ürəyində düşünür ki, yəqin sabah istirahət olacaq. Sən saydığını say, gör fələk nə sayır.
Bu dəfə daha tez, səhər saat 5:00-da "qalx" komandası verilir. Qısa hazırlıqdan sonra yola düşürük. Avtobusda kimisi mürgüləyir, kimisi mahnıya qulaq asır, mənsə avtobusun pencərəsindən günəşin doğmasını izləyirəm. Günəşin ilk şüaları özü ilə birlikdə istilik gətirir. Təlimlərin çətinliyi azmış kimi, havanın istiliyi də sanki qəsdimizə durub.
Avtobus dayananda təlimçimiz Əlisafa Mehdiyev və Müdafiə nazirliyinin peşəkar mütəxəssisləri bildirdi ki, bu günki dərsləri əlahiddə kəşfiyat briqadasının zabitləri deyəcəklər.
Briqadanın ərazisinə girib, məxfiliyin qorunması üçün təlimatları dinlədikdən sonra, kəşfiyat qrupunun düşmənin postunu ələ keçirməsi və bu zaman jurnalistlərin necə işləməsi qaydasını öyrənirik. Və dərhal sonra kəşfiyyat qrupunun hücum planı başlayır. Bu zaman operatorlar, fotoqraflar və reportyorlar özlərinə mövqe seçir. Əməliyyatın irəlilədikcə yerdəyişmələr də baş verir, bu zaman isə əsas məsələ jurnalistlərin tam təhlükəsiz hərəkət etməsinə diqqət yetirilir. Kəşfiyat rəisi yanlışlığa yol verən jurnalistlərə yerində iradlarını tutur və əməliyyat öz axarı ilə davam edir. Kəşfiyyatçılar düşmən postunu ələ keçirir. Jurnalistlər isə bu bu əməliyyatı sona qədər izləyir.
Təbii olaraq sual yaranır. Jurnalist hara, kəşfiyyat qrupunun keçirdiyi məxfi əməliyyatında işləmək hara?
Haqlı və yerində sualdır. Ancaq burada jurnalistin əməliyyatda işləməsi yox, güllə altında necə davranması və düşə biləcəyi situasiyada bu vəziyyətdən çıxış yolu aşılanır.
Təlimdə jurnalistlərə doğruları və yanlışları deyildikdən sonra, kəşfiyyatçı mütəxəssis həyatda qalmağın yollarını öyrədir. Ac qalmamaq üçün təbiətdən hansı qidaların alınması, suyun əldə edilməsi barədə geniş bilgilər verilir. Artıq təlim iştirakçıları bilir ki, ac qalan zaman ilan, tısbağa, qurbağa və digər canlılardan hansı formada istifadə edərək sağ qala bilər.
Bundan əlavə azmış bir şəxs hansı formada daldanacaq düzəldə bilər və bunun növlərini dərk edir. Ocaqların növləri, ocaqlar qalanan zaman tüstülü və tüstüsüz ocaqların necə qalanmasını praktiki olaraq öyrənirik.
Əsas məsələlərdən biri isə azmış adamın istiqamət tapmasıdır. Bunun isə müxtəlif yolları diqqətimizə çatdırılır.
Bütün bu təlimlər keçirildikdən sonra, növbə gəlir maneələri dəf etmək məsələsinə. Bir qrup kəşfiyyatçı maneələri dəf etdikdən sonra növbə çatır jurnalistlərə. Düzdür, kəşfiyyatçıların sürətində baxdıqda bizim sürət tısbağa yerişini xatırlatsa da, ancaq maneələri dəf edirik. 18 metr yüksəklikdən iplə aşağı enmək isə adrenalinin pik həddi olur.
Sual oluna bilər, bu jurnalistin nəyinə lazımdır (?), jurnalistin işi yazmaqdır axı. Xeyir! Jurnalistin işi təkcə redaksiyada oturmaq yox, xəbərin mərkəzinə getmək, ən qaynar nöqtələrdən xəbər gətirməkdir. Ona görə də, bütün bunlar lazımlı və vacibdir. Unutmayaq ki, təlimdə tökülən hər bir tər damlası döyüşdə əsgərin qələbəsini asanlaşdırır. Elə biz də əsgərik, peşəmizin əsgəri.
Yeri gəlmişək bildirim ki, artıq Türkiyədə eləcə də digər ölkələrdə qaynar nöqtələrə savaş müxbirliyi kurslarını keçməyənləri buraxmırlar. Özü də, jurnalistlər bu tip təlimlərə fantastik məbləğdə pul ödəyirlər. Bizdə isə bu təlimlər pulsuzdur. Dövlət hesabınadır. Bu təlimlərdə yanacağa, yeməyə və digər məsələlərə ayrılan xərci nəzərə alsaq onda görərik ki, dövlətin də bu işdə marağı böyükdür. Çünki Azərbaycan müharibə şəraitində yaşayır. Bir tək bu haqq verir ki, Azərbaycanda xüsusən cəbhədən, hərbdən yazan jurnalistlərə dəstək olaraq bu tipli təlimlər keçirilsin.
Müxtəlif yaşlı, müxtəlif çəkili jurnalistlər ağır şəraitdə və xüsusən günün altında keçirilən bugünkü təlimi yekunlaşır. Təlimin sonunda dizlərimi yerə qoyub günəşə üsyan edirəm.
Təlimlərin getdikcə ağırlaşdığını nəzərə alsaq, bizi yəqin ki, sabah daha da ağır bir təlim gözləyir. Artıq bu ağırlığın vərdişkarına çevrilmişik.//olke.az
