Putin Azərbaycana gözlənilməz zərbə vurdu - Bakının cavabı nə olacaq?

Ümumrusiya Azərbaycan Konqresinin (ÜAK) qeydiyyatı ləğv edilib. Rusiya Ali Məhkəməsi bununla bağlı müvafiq qərar qəbul edib. Səbəb kimi Azərbaycan diaspor təşkilatının Rusiya qanunvericiliyini pozması göstərilib.

GoldNews.Az A24.Az-a istinadla bildirir ki, Atlas Araşdırmalar Mərkəzinin rəhəbəri, politoloq Elxan Şahinoğlu ÜAK-ın qeydiyyatının ləğv edilməsini belə şərh edib: “Ümumrusiya Azərbaycanlıların Konqresinin qeydiyyatının ləğvinə necə cavab verməliyik? İki variant var. Birinci variant odur ki, bir az deyinib, yenidən heç nə olmamış kimi Rusiya ilə əməkdaşlığı davam etdirməli, silah almalı və bu ölkəni “strateji” tərəfdaş adlandırmalıyıq”. Politoqun sözlərinə görə ikinci variant isə qeydiyyatın ləğvinin Rusiya-Azərbaycan münasibətlərinə təsirsiz ötüşməyəcəyi haqqında Moskvaya konkret mesaj ünvanlanmalıdır: “Çünki bu qərar sıradan hansısa təşkilatın qeydiyyatının ləğvi deyil, hüquqi yox siyasi qərardır və qərarın müəllifi sıravi bir məhkəmə hakimi deyil, Kremlin başbilənləridir”.

E.Şahinoğlu qeyd edir ki, Kreml Rusiyadan yan keçən TAP, TANAP, Bakı-Tiflis-Qars laiyəhlərindən narazıdır: “Buna görə bizi cəzalandırmaq yolunu tutublar. Üstəgəl cəbhə bölgəsindəki artan üstünlüyümüz Kremli narahat edir”. “Rusiyaya silah alışından 5 milyard dollar xeyir vermişik. Gərək bu xeyri bizə silah satmaq istəyən başqa dövlətlərə verək. Rusiyanın Dağlıq Qarabağ münaqişəsindəki təkbaşına vasitəçilyindən də imtina etməliyik”, – deyə politoloq əlavə edib.