Azərbaycan düşməni qısa zamanda tam məhv edəcək - Ermənistana bəla kimi xəbər

Qarabağda müharibə başlanması ehtimalı hazırda yüksək qiymətləndirilir.

GoldNews.Az A24.Az-a istinadən bildirir ki, düşmən təxribatlarının qarşısının alınması məqsədilə keçən ilin aprelində keçirilmiş məhdud hərbi əməliyatlarla Qarabağ problemini dünya gündəminə gətirmək cəhdi sonrakı iki ay ərzində Vyana və Sankt-Peterburq danışıqları ilə səngidi. Eyni zamanda Qarabağ məsələsinin hərbi həlli üçün “4 günlük müharibədə” Azərbaycanın qazandığı nailiyətlərin bir qismi, hərbi əməliyatların davamı olmadığı səbəbindən, keçən bir il ərzində əhəmiyətini itirdi.

Ölkə daxilində “aprelin” yaratdığı ruh yüksəkliyi və inam əvvəlcə hərbi əməliyatların dayandırılması ilə, daha sonra qazanılan hərbi uğurların başa gəldiyi itkilər sayı ilə, diplomatik status-kvonun dəyişməməsi, bu ilin fevralında cəbhədə baş vermiş əsassız itkilər və sonda orduda illərlə yer almış xəyanətkar şəbəkənin fəaliyət göstərməsi faktı ilə “sıfırlandı”. Sosial problemlərin kəskinləşməsi də Qarabağı ictimai diqqətin mərkəzindən kənara çəkdi.

Nailiyətlər sırasında “quru qalıqda”- 2016-cı ilin aprelində ordunun əldə etdiyi yüksəkliklər və düşmən üzərində nominal hərbi-texniki üstünlüyümüz qalır. Rəsmi təbliğat apreldə tutulan yüksəklikləri “strateji” adlandırsa da, peşəkar baxımdan həmin yüksəklirər “əməliyat” əhəmiyətlidir və Qarabağ Hərbi Əməliyatlar Səhnəsində strateji əhəmiyətə malik olmadıqları məlumdu. Bu yüksəkliklər yalnız qarşıdakı məkana nəzarət və gələcək hücumlar üçün platsdarm kimi dəyərlidilər.

Hərbi-texniki üstünlüyümüz potensial olaraq qalmaqdadır. Lakin bu üstünlük dayandığımız yerdə bizə heç nə vermir və yalnız döyüş qarşıdurması şəraitində gerçəkləşsə, real üstünlüyümüzə dönəcək. “Apreldə” əldə olunan psixoloji üstünlüklərdən- düşmənin “məğlubedilməzlik mifinin” dağıdılması hələ aktivimizdədir.

Qarabağın hərbi yolla həlli strategiyası yalnız düşmənin mütəşəkkil müqavimət qabiliyətinin qısa zamanda və tam məhvindən ibarətdir. Məsələ bu şəkildə həll olunmasa, cəbhədəki ən parlaq qələbələr və uğurlar taktiki xarakter daşıyacaq və müharibənin son məqsədlərinə həlledici təsir göstərməyəcək. Müharibə başladılan təqdirdə qısa zamanda strateji qələbənin əldə olunmaması, hərbi əməliyatların uzanması avtomatik olaraq, düşmənin qələbəsi demək olacaq.

Hərbi ekspert Nazim Bayram