Atasına qeyri-adi ehsan verən şəxs - SƏBƏBİNİ AÇIQLADI

Məlumdur ki, ötən gün Sumqayıt şəhər sakini Qalib Namazov rəhmətə gedən atası üçün qeyri-adi ehsan verib. Belə ki, o, atası Hidayət Namazovun 40 mərasimini keçirməkdən imtina edərək əvəzində Kamboca ölkəsində artezian quyusu qazdırıb.

Namazov Qalib Hidayət oğlu 1978-ci ildə Sumqayıt şəhərində dünyaya gəlib. O, Azərbaycan Dövlət İqtisad Universitetinin "Qeyri ərzaq mallarının əmtəəşünaslığı” fakültəsində təhsil alıb. Uzun müddət Türkiyədəki nəşriyyatların birində işləyən Qalib bəy son 6 aydır ki, anasının xəstəliyi və atasının vəfatı ilə əlaqədar Azərbaycana gəlib. Q.Namazovun atası yanvarın 1-də rəhmətə getsə də, quyunun açılışı 31 iyul tarixində həyata keçirilib. Quyunun ərsəyə gəlməsi isə 15 günə baş verib və o, 250 dollar xərcə başa gəlib. Qalib Namazovun sözlərinə görə atası kommunizm dövründə yaşadığı üçün namazsız, orucsuz bu dünyadan köçüb. Çox düşünüb-daşındıqdan sonra fevral ayının 10-da atasının 40 mərasimini keçirməmək, əvəzində isə hər dəfə atasına rəhmət oxutduracaq bir iş görmək qərarına gəlib. Atasının dünyasını dəyişməsindən 3 gün sonra o, elan edib ki, 40 mərasimi keçirilməyəcək və onun yerinə iribuynuzlu heyvan kəsərək ehsan kimi paylanacaq. Lakin sonradan o, bu fikrindən daşınıb: "Biz Hacı Zeynalabdin Tağıyev, Məmməd Əmin Rəsulzadə kimi şəxsiyyətlərin davamçıları, nəvə-nəticələriyik. H.Z.Tağıyevin yüz il bundan qabaq çəkdiyi suyu içən hər kəs indi də ona rəhmət oxuyur”.

Q.Namazov düşünüb ki, ehtiyac olan yerdə quyu qazdırsa, o sudan içən hər kəs onun da ata-anasına rəhmət oxuyarlar: "Gedib üç-dörd min pul verib 40 mərasimi keçirirsən və insanlar hələ bir dalınca deyirlər ki: "ət də tam bişməmişdi”. Bəzi ölkələr var ki, onlar çox kasıb vəziyyətdə yaşayırlar, uşaqlar ayaqqabı əvəzinə fanta butulkası geyinib gəzirlər. Somali, Keniya, Nigeriyada yaşayan insanlar aclıqdan və susuzluqdan ölürlər. Bu vəziyyət insan olaraq bizə çox pis təsir bağışlayır. Düşündüm ki, bu işi görsəm, daha çox yaxşılıq etmiş olaram. Cənubi Şərqi Asiyada yerləşən Kambocada türk iş adamı dostum var idi və ona müraciət etdim. O da bir səhv edib, mənə zəng etdi ki, oraya Azərbaycanın deyil Türkiyənin bayrağını vurmuşam. Dedim ki, əstəğfrullah, biz bir millət, iki dövlətik. İndi durub onu danlayası deyiləm ki?! Əsas odur ki, istəyimizi həyata keçirdik".

Xeberle.com