Radio kanaldan açıqlama - "Yayımın dayandırılması müvəqqətidir" -

Tovuz-Qazax bölgəsində radio dalğasında Antenn 101 FM-in yayımı dayanıb.

Goldnews.az xəbər verir ki, İlkin Məmmədov adlı oxucu Milli.Az-a məktub göndərərək, yayımın dayandırılmasının səbəbini bilmək istəyib.

"Bizim bölgə üçün radio dalğasında ümumilikdə 6 FM var. Bunlardan da biri Antenn 101 FM-dir. Artıq 7 avqust tarixindən etibarən radioda bu kanalı dinləyə bilmirik. Ona görə də kanalın hansı səbəbdən dayandırıldığını bilmək istəyirik".

Bununla bağlı 101 Antenn FM-in rəsmi saytında hər hansı bir xəbərə rast gəlmədik. Saytda radio kanalın bütün bölgələr üzrə əhatə dairəsini bildirən hissə var. Burada Qazax bölgəsi üçün yayım tezliyi 100FM olaraq qalır.

Belə olan halda, məsələ ilə bağlı Radio Antenn 101 FM-ə sorğu göndərdik. Radionun əməkdaşı Çinarə Cəfərova yayımın dayandırıldığını təsdiqlədi.

"Həmin bölgə ilə bağlı yayım avadanlıqlarında profilaktik təmir işləri gedir. Bu yenilənmə ilə əlaqədar yayım müvəqqəti olaraq dayandırılıb. Təmir işləri bitdikdən sonra isə yayım tezliyi bərpa olunacaq".

Qeyd edək ki, radionun əməkdaşı təmir işlərinin nə zaman yekunlaşacağı haqqında dəqiq tarix bildirilməyib.