Deputatlardan qəribə çağırış: "Ölüm hökmü yenidən bərpa edilsin!"
Sosial şəbəkələrdə geniş müzakirə mövzusuna çevrilən ölüm hökmünün konstitusiyadan çıxarılmaması insanlarda getdikcə daha da narahatlıq doğurur.
Qardaş ölkə Türkiyədə də ölüm hökmümün bərpası ətrafında müzakirələr aparılır. Qonşu İran İslam Respublikasında da ölüm hökmü qalmaqdadır.
Azərbaycanda ölüm hökmünün bərpa oluna bilərmi? Millət vəkilləri bu haqda nə düşünürlər?
GoldNews.Az xəbər verir ki, Böyük Quruluş Partiyasının sədri, Milli Məclisinin İnsan hüquqları komitəsinin, İctimai birliklər və dini qurumlar komitəsinin, İntizam komissiyasının üzvü Fazil Mustafa A24.Az-a açıqlamasında bildirib ki, ölüm hökmünün bərpasının müəyəyn qism cinayətlərə tətbiq edilməsinin tərəfdarıdır:
“Xüsusilə də hamilə qadınların zorakı yolla öldürülməsi, körpə uşaqların yandırılması və.s bu hallarda tətbiq edilməsini zəruri sayıram. Amma Azərbaycan Avropa məkanında özünə müəyyən dərəcədə yer tutuan bir dövlətdir. Bu baxımdan da bizim Avropa Şurası qarşısında öhdəliyimiz var. Ona görə də ölüm hökmü ləğv olunub. İndi birdən – birə bu hökmü müəyyən dərəcə yenidən bərpa olunması Avropa inteqrasiyamızda və orda təmsilçiliyimizdə ciddi problemlər yarada bilər”.
Deputat əlavə edir ki, indiki şərtlər də bu məsələnin yenidən konstitusiyaya salınması real görünmür:
“Amma mümkündür. Məhdud kateqoriyalı cinayətlərə görə ölüm hökmünün bərpa olunmasının tərəfdarıyam”.
Məsələ ilə bağlı açıqlama verən Azərbaycan Demokratik İslahatlar Partiyasının sədri, Milli Məclisin Elm və təhsil komitəsinin, Beynəlxalq münasibətlər və parlamentlərarası əlaqələr komitəsinin üzvü Asim Mollazadənin fikrincə, ölüm hökmününü bərpasına heç bir əsas yoxdur:
“Azərbaycan Avropa Şurasının üzvüdür. Azərbaycan Avropa Şurasına daxil olmamışdan əvvəl o öhdəliyi götürüb. Bununla da uzun illərdir Azərbaycanda ölüm hökmü icra olunmur. Bu da cəzmiyyətin humanist olduğunu təzahürüdür”.
Milli Dirçəliş Hərəkatı Partiyasının rəhbəri, Milli Məclisin Müdafiə, təhlükəsizlik və korrupsiya ilə mübarizə komitəsinin üzvü Fərəc Quliyev açıqlamasında vurğulayıb ki, Azərbaycan daha çox humanistləşdirmə, yüngülləşdirmə haqqında düşünür:
“Hesab etmirəm ki, ölüm hökmü yenidən bərpa edilsin. Azərbaycan beynəlxalq konvensiyalara qoşulub, müəyyən öhdəlikləri də var. Bu öhdəliklər də daha çox humanistləşməklə əlaqəlidir. Elə cinayətlər var ki, onlara cavab adekvat olmalıdır”.
Deputat fikrincə, elə hadisələr, günahlar var ki, onların cəzaları yüngülləşdirilməsi haqda düşünülməlidir:
“Amnistiyaların qəbul olunması, əfv sərəncamlarının verilməsi də o xəttin göstəricisidir. Biz daha çox humanistləşdirmə, yüngülləşdirmə haqqında düşünürük. Ona görə də ölüm hökmünün bərpası mümkün deyil”.
“Amma şəxsi fikrim belədir ki, bir çox hadisələrlə bağlı ölüm hökmünün tətbiq olunması vacibdir. Məsəl üçün biz sosial şəbəkələrdə, mətbuatda baxırıq ki, az yaşlı qızlara qarşı zorakılıq hərəkətləri, kütləvi adamların öldürülməsi və.s belə hallarda ölüm hökmünün tətbiqi məncə vacibdir. Bu mənim subyektiv fikrimdir. Azərbaycanın götürdüyü xətt bayaq dediyim kimi daha çox yüngülləşdirmək, beynəlxalq konvensiyalara uyğun davranma və daha çox cəzaların humanistləşdirilməsi ilə bağlı olan bir xətdir”, – deyə F.Quliyev əlavə edib.
Qeyd edək ki, Azərbaycanda ölüm hökmü 1998-ci il fevralın 10-da ləğv edilib.
