Azərbaycanda növbədənkənar prezident seçkiləri - Deputatlardan ilk reaksiya

“Bu il seçki ilidir. Onun apreldə, yaxud oktyabr ayında keçirilməsinin elə bir əhəmiyyəti yoxdur. Əksinə, seçkini vaxtından əvvəl keçirməklə Azərbaycanda seçkidə iştirak etmək istəyən bütün qüvvələrə seçkiyə hazırlıq platformasını tətbiq etmək üçün şərait yaradılır”.

Bunu “Qafqazinfo”ya açıqlamasında YAP-çı deputat Aydın Mirzəzadə Azərbaycanda növbədənkənar prezident seçkilərinin təyin edilməsindən danışarkən deyib. O qeyd edib ki, 2018- ci il Azərbaycanda şanlı bir yubileydir:

“Belə ki, Azərbaycan Xalq Cümhuriyyətinin 100 illik yubileyi qeyd olunacaq. İl ərzində bununla bağlı çoxsaylı yüksək səviyyədə dövlət tədbirləri keçiriləcək. Prezident seçkilərinin yubileyə qədər keçirilməsi yeni prezidentin səlahiyyəti müddətində baş tutacaq. Bu yeni yüzilliyə yeni proqramla, baxışlarla Azərbaycanın güclənməsi üçün böyük planlarla qədəm qoymasına şərait yaradacaq”.

Deputat Fazil Mustafa isə qeyd edib ki, prezidentin son referendumda edilən dəyişikliyə görə növbədənkənar seçki təyin etmək səlahiyyəti var: “Yəqin ki, seçkinin növbədənkənar təyin edilməsinin izahı olacaq. Bildiyiniz kimi, artıq prezidentlik müddəti 7 ildir.

Bundan öncə də belə təkliflər var idi ki, 2025- ci ildə keçiriləcək parlament seçkiləri ilə prezident seçkiləri üst-üstə düşməsin deyə vaxtının dəyişilməsi nəzərdə tutulurdu. Ola bilsin ki, gələcəkdə bu məqsədə görə belə bir vaxt təyin olunub”.