Yeni təyinatlar - Məhərrəm Əliyev və Elçin Quliyev - İlham Əliyevin islahatlarının səbəbi

Son günlər prezident İlham Əliyev dövlətin idarəetmə strukturunda islahatlara başlayıb.

Bu addımların səbəbi nədir və hansı yeniliklərə səbəb olacaq?

Millət vəkili Aydın Mirzəzadə A24.Az-a açıqlamasında bu sərəncamları ölkənin inkişafına yönəldilmiş islahatların tərkib hissəsi kimi yüksək qiymətləndirdiyini bildirib:

“Ötən ilin sentyabrında Azərbaycan Respublikasının Konstitusiyasına dəyişikliklərlə bağlı keçirilən referendumdan sonra ölkəmizdə müxtəlif sahələri əhatə edən islahatlara başlanıldı. Bu islahatlar içərisində idarəetmə orqanlarının optimallaşdırılması, lazım gəldikdə kadr dəyişikliyi kimi addımlar artıq öz müsbət nəticəsini verməkdədir. Diqqət cəlb edən bir məqam da həmin islahatların təkcə orta zümrədə deyil, eyni zamanda ali idarəetmə orqanlarında da keçirilməsidir. Bir neçə gün bundan əvvəl cənab Prezidentin sərəncamı ilə Prezident Adminstrasiyasının yenilənməsi, idarəetmə mexanizminin optimallaşdırılması bu qəbildən olan məsələlərdəndir.

Bu gün isə cənab Prezident Dövlət Sərhəd Xidmətinin (DTX) strukturunun təkmilləşdirilməsi ilə bağlı növbəti sərəncamı imzaladı. Dövlətçiliyin qorunmasında mühüm funksiyaları olan DTX-nın fəaliyyət strukturu daha da dəqiqləşdirildi.

Hesab edirəm ki, Azərbaycanda islahatların cəmiyyətin sifarişi olaraq, daim gündəmdə olması, zamanın tələbindən asılı olaraq, bu və digər sahələrdə yeniliklərin edilməsi xüsusi əhəmiyyət daşıyır. Ən əsası isə özünü doğrultmuş köhnə kadrlarla yanaşı, yeni gənc kadrların da irəli çəkilməsi təqdirəlayiqdir. Çünki ölkənin qarşısında duran problemlərin həllində onların potensialından da istifadə ediləcək”.

Qeyd edilir ki, islahatlar davam edəcək və bir neçə məmur da işi ilə vidalaşacaq.