Təhsil ekspertlərindən DİM-ə ağır cavab: "Dövlətin pulunu xərcləyiblər!"

Bu gün Dövlət İmtahan Mərkəzi öz "facebook" hesabında paylaşdığı məlumatda, abituriyentlərə ixtisas seçimində dəstək olan təhsil ekspertlərini "sabun köpüyü kimi şişmiş ekspertlər" adlandırıb.

GoldNews.Az xəbər verir ki, PrimeTime.Az məsələ ilə bağlı təhsil eksperti Əjdər Ağayevlə əlaqə saxlayıb. Ekspert DİM-i ədəb-ərkan qaydalarına riayət etməyə çağırıb: "Bu cür təhqiramiz ifadələrlə kimisə tənqid etmək olmaz. Bu, insanlığa da yaraşmır, mədəniyyətə də yaraşmır, savadlı insana, ziyalıya heç yaraşmır. Bu, tərbiyəsizlik simvoludur. Qeyd edim ki, "təhsil eksperti" anlayışı nisbidir. Ekspert formalaşdıran bir institut yoxdur. Hər kəs öz təcrübəsindən, təhsil sahəsində anlayışlarından istifadə edərək dövlətimizin, xalqımızın işlərinin yaxşı olması üçün çalışır. "Təhsil ekspertlərinə inanmayın" hökmünün çıxarılması zəif düşüncənin məhsuludur və çox ədalətsiz yanaşmadır. Mən şahidiyəm ki, ekspertlər müraciət edən vətəndaşları DİM-ə yönləndirir. Bildirir ki, abituriyent jurnalı vəsaitlərindən istifadə edin. Əgər Dövlət İmtahan Mərkəzi kimisə hədəfinə alıb bu fikirləri söyləyirsə, cəsarətini toplayıb həmin şəxsə mesajını ünvanlasın. Hər kəsi hədəfə almaq səviyyəsizlikdir. Mən çox yaxşı bilirəm ki, bu il rus bölməsi üzrə xeyli tələbə çöldə qalıb. Niyə? Çünki qurum öz işlərindəki qüsurları yaxşı görə bilmir. Keçidi artırıblar, bütün yerlər boş qalıb. Deməli, Dövlət İmtahan Mərkəzi şərait yaradır ki, həmin rus bölməsi üzrə yüksək bal toplayan abituriyentlər məcbur olub xaricdəki ali təhsil müəssisələrinə üz tutsun, vətənini, xalqını atıb getsin".

PrimeTime.Az sözügedən məsələ ilə bağlı təhsil eksperti Kamran Əsədovla da əlaqə saxlayıb. O, DİM-in fəaliyyətində xeyli qüsurlar olmasından və tənqidləri qəbul edə bilməməklərindən söz açıb: "1992-ci ildən bu günə kimi həmin qurumun fəaliyyəti danılmazdır. Ötən il ölkə prezidentinin müvafiq sərəncamından sonra Dövlət İmtahan Mərkəzi yarandı. Ötən ildən bu günə qədər qurumun fəaliyyəti ilə bağlı xeyli qüsurlar ortaya çıxıb. Bu gün də sözügedən qurum bizə qarşı cinayət məcəlləsinə zidd olan ifadələr işlədib. İlk olaraq bildirmək istəyirəm ki, Vergilər Nazirliyində qeydiyyatdan keçmişəm, ödənişli xidmətlərin vergisini ödəyirəm. Azərbaycan torpaqları uğrunda şəhid olan, əlil olan, itkin düşən yüzlərlə qəhrəmanın övladlarını universitetə pulsuz hazırlayıram. DİM pulsuz xidmət göstərirmi? Çıxsın desin ki, filan işləri pulsuz görürük. Görmürlər. Necə ola bilər ki, DİM göstərdiyi keyfiyyətsiz xidmətlərə görə, pul ala bilir, amma biz ala bilmirik? İkinci, onu qeyd etmək istəyirəm ki, qurumun ixtisas seçimi ilə bağlı sosial şəbəkələrdə yayımladığı video-rolik var, həmin abituriyentlərdir ki, onlarn məsləhətləri ilə 669 balla ali məktəbə qəbul olmayıb. 5 gün müddətində sizin fəaliyyətinizdəki problemləri ortaya qoydum, test kitabçalarınızdakı səhvləri üzə çıxardım. Həmin səhv sualların qarşısına "*" işarəsi qoyursunuz ki, səhvdir də, oldu, bağışla. Səhvlər sizin özünüzdədir! Dövlətin pulunu xərcləyib nəşr etdiyiniz kitabçalar səhvlərlə doludur. Günahı başqasında axtarmaq doğru deyil. Biz bu quruma səhvlərini deyirik, bunlar da bizi təhqir edirlər. Bir neçə il bundan öncə də bir çox səhvlərlə bağlı TQDK-ya müraciət etmişdik. Qurumun sözçüsü, cinayət məcəlləsinin bir neçə maddəsi ilə hazırda axtarışda olan Elnur Nağızadə də bizə qarşı bu cür ifadələr söyləmişdi. İndi baxın o haradadır və biz haradayıq. Ölkə başçımızın sərəncamlarından biri də vətəndaşlara müsbət xidmət göstərməkdir. Əgər biz DİM-in satışa çıxardığı məhsulun pulunu verib almışıqsa, deməli o məhsul artıq bizimdir. Biz kommersiya məqsədilə o kitabçalardan istifadə etmirik. Günümüzün reallıqlarından biri də vətəndaşlarımızın əksəriyyətinin sosial şəbəkə istifadəçisi olmasıdır. Biz də onların rahatlığı üçün DİM-in statistik göstəricilərinin kiçik bir hissəsini paylaşmışıq. Yəni, vətəndaşlar bu məlumatın rəsmi olduğunu bilsin. Bu, qanunvericiliklə qadağan olunmayıb. Hər hansı bir məhsulun kommersiya məqsədilə təkrar çap edilib, satışa çıxarılması qadağan olunub. Amma DİM bu məlumatı kitabçada qeyd etməyib. Dövlət İmtahan Mərkəzini cinayət məcəlləsi barəsində məlumatlı olmağa səsləyirəm. Kiminsə şərəf və ləyaqətini alçaltmaq dövlət qulluqçusuna yaraşmayan bir hərəkətdir".

Dövlət İmtahan Mərkəzinin sosial şəbəkələrdə yaydığı məlumatı təqdim edirik: Şahin Sərdarlı