Tərtərdə minaya düşən gəncin qardaşı: "Onun müalicəsi üçün maddi yardıma ehtiyac var"

Bir neçə gün bundan öncə Tərtərdə minaya düşən rayonun Həsənqaya kənd sakini Azad Həsənovun müalicəsi üçün maddi yardıma ehtiyac var. GoldNews.az A24.az-a istinadən xəbər verir ki, minaya düşən Azadın qardaşı Ceyhun Həsənov məlumat verib. O bildirib ki, hazırda Bərdə rayonunda müalicə alan qardaşının vəziyyəti yaxşı deyil: “Dünən komadan ayıldı və palataya yerləşdirdilər. Bu gün isə vəziyyəti yenidən ağırlaşdığından təkrar olaraq reanimasiyaya yerləşdirdilər. Hələ ki, ayılmayıb. Maddi cəhətdən köməyə ehtiyacımız var. İcra Hakimiyyəti də bilir bunu. İcra Hakimiyyətindən cəmi iki dəfə gəlib maraqlanıblar, amma heç nə deməyiblər bizə. Ona görə də biz də maddi köməkliklə bağlı qohum-əqrəbaya demişik. Ki, kimin gücü nəyə çatırsa, kömək etsin”.

Qeyd edək ki, oktyabrın 11-də səhər saatlarında Kəlbəcər rayonundan məcburi köçkün olan 1996-cı il təvəllüdlü Azad Həsənov Həsənqaya kəndi ərazisində, neytral zonada minaya düşüb.

Xatırladaq ki, bu, Azad Həsənovun ailəsində yaşanan ilk faciə deyil. Belə ki, 2016-cı ilin aprel döyüşləri ərəfəsində ermənilərin Həsənqaya kəndini artilleriya atəşinə tutması nəticəsində Azadın 16 yaşlı bacısı Həsənova Turanə Kamandar qızı həlak olmuşdu.