Sığorta tarixçəsi əmsalı tətbiq olunur — sürücülər üçün nə dəyişəcək?
Azerbaycan Mərkəzi Bankı iyunun 16-dan etibarən avtoneqliyyat vasitələrinin icbari sığortasında dəyişiklik edib. Bonus-Malus sistemi ləğv olunur və onun yerinə fərdi məsuliyyətə əsaslanan Sığorta tarixçəsi əmsalı tətbiq ediləcək.
Sığorta tarixçəsi əmsalı nədir?
Yeni model üzrə sığorta tarixçəsi birbaşa avtomobili faktiki idarə edən sürücü ilə əlaqələndiriləcək. Sığorta müqaviləsinin kimin adına bağlanmasından asılı olmayaraq, qəza həmin sürücünün tarixçəsinə təsir edəcək.
Tarixçə əmsalına görə hesablanma
Sistem daha sadə faiz mexanizmi üzərində qurulur. Hər 275 qəzasız gün üçün sürücüyə 5% endirim verilir. Törədilən hər qəza sığorta tarixçəsinə görə növbəti polis üçün 30% əlavə yaradacaq. Əmsal heç vaxt 0.60-dan aşağı və 3-dən çox ola bilməz.
Kimlərə şamil olacaq?
Fiziki şəxslər üçün avtomobili bir neçə sürücü istifadə etdikdə, sığorta haqqı hesablanarkən həmin sürücülərin hər birinin tarixçəsi nəzərə alınacaq. Əvvəllər tətbiq olunan 1.15 risk əmsalı bundan sonra yalnız nəqliyyat vasitəsini sahibi ilə birlikdə idarə edən sürücülərin sayı 5 və daha çox olduqda tətbiq ediləcək. Hüquqi şəxslər üçün əmsal sabit olaraq 1 saxlanılacaq. Taksi fəaliyyəti göstərən nəqliyyat vasitələrində isə şirkətin də sığorta tarixçəsi formalaşacaq və qəza halında ona uyğun əlavələr və ya güzəştlər tətbiq ediləcək.
Sistemin təsiri və məqsədi
Yeni yanaşma sığorta tarixçəsini şəxsə bağlayır. Bu, risklərin daha dəqiq qiymətləndirilməsinə və təhlükəsiz sürücülüyün təşviqinə xidmət edəcək. Qurumlar hesab edirlər ki, sistem daha şəffaf və ədalətli olacaq.
İcbari Sığorta Bürosunun açıqlamasında dəyişikliklərin tətbiqinin avto sahiblərinə davranışa görə mükafat və ya cəza mexanizmini gücləndirəcəyi bildirilir. Sığorta qiymətlərində gözlənilən dalğalanmalar isə sürücülərin qəza statistikasından asılı olacaq.
