Naxçıvanda həmyerlisi tərəfindən təcavüzə uğrayan 4 yaşlı qız öldü

Naxçıvanda həmyerlisi tərəfindən təcavüzə uğrayan 4 yaşlı qız dünyasını dəyişib.

GoldNews.az xəbər verir ki, bu barədə sosial şəbəkədə məlumat verilib. Belə ki, azyaşlı 3 gün komada qaldıqdan sonra həyatını itirib.

Xatırladaq ki, hərbi xidmətdən yeni dönmüş şəxs Culfa rayonunda toy məclisində iştirak edib. O, sərxoş olduqdan sonra 4 yaşlı qız uşağına təcavüz edib. Sözügedən şəxs uşağı nənəsinin yanına aparmaq adı ilə məclisdən uzaqlaşdırıb. Daha sonra onu yaxınlıqdakı dəmir yolunun kənarına aparıb, bir neçə dəfə zorlayıb. Yaxınlıqdan keçən şəxs uşağın çığırtısını eşidib və həmin şəxsi yaxalayıb.

Azyaşlının ötən gün Culfadakı xəstəxanada vəfat etdiyi deyilir.

Əhali tərəfindən ələ keçirilən şəxsin əlləri və ayaqları yandırılıb. Cinsiyyət orqanı kəsilib. Daha sonra polis onu insanların əlindən alaraq həbs edib.

Qeyd edək ki, yuxarda qeyd edilənləri jurnalist Aynur Qurbanqızı şəxsi "Facebook" səhifəsində paylaşıb.

Hadisə hələki rəsmi orqanlar tərəfindən təsdiqini tapmayıb. Qeyd olunanların həqiqət olub-olmadığı istiqamətində araşdırmamızı davam etdiririk.

Məsələ ilə bağlı metbuat.az-a açıqlama verən DİN-in KİV və İctimaiyyətlə əlaqələr şöbəsinin rəisi İlham Babayev baş verən hadisənin təsdiqini tapdığını bildirdi:

"Doğrudur, hadisə baş verib. Prokurorluq tərəfindən baş verən faktla bağlı araşdırma aparılır".