İtkin alpinistin yazdığı son şeir hər kəsi kədərləndirdi: "Tufanla, küləklə pəncələşərək..."

“Gilavar” - hava və ekstrim idman klubunun üzvü itkin düşən alpinist Hüseynov Baburun son yazdığı şeir hər kəsi təsirləndirib.

GoldNews.az xəbər verir ki, şeiri aparıcı Cəlalə Nəzəroğlu şəxsi Facebook hesabında paylaşıb.

Qeyd edək ki, “Gilavar” - hava və ekstrim idman klubunun üzvləri Cəbrayılzadə Fəridə Zəbiyulla qızı, Hüseynov Babur Vaqif oğlu və Bünyatzadə Namin Nizami oğlunun tapılması məqsədilə dekabrın 27-də başlanan axtarış işləri hələ də davam edir.

İçimdə mütilik zəncirlərini, Didib parçalayır vəhşi bir heyvan! Bu heyvan adlanır-azadlıq eşqi, O eşq ki həsrətdir ona çox insan.

Tufanla,küləklə pəncələşərək, Soyuq göy sularla,buz dalğalarla, Qaya tək sevişib titrəyəcəyəm. Şəhərin suni,boz işıqlarını, Ən uzaq,sehrli,al ulduzlarla, Ən parlaq səmayla əvəz edəcəm!

Tənha mağaraya çəkilərək mən, Dalaram seyrinə kəhkəşanların. Ruhumun soyumuş,boş otaqları, Dolacaq sehriylə asimanların.

Bir tənha ağac tək bitib zirvədə, Olaram təsəlli tənha qəlblərə. Bir tənha ada tək itib dənizdə, Köçərəm ən dilsiz sükunətlərə.

Ey Tanrının ərşi sayılan qəlbim! Səni zahidliklə dolduracağam. Bakirə ruhumun uca məbədi! Sənin paklığının keşiyində mən, Sadiq bir əsgər tək daim duracam!