Ermənilərin Füzuli istiqamətində atdıqları raketin parametrləri - ƏGƏR YAŞAYIŞ ƏRAZİLƏRİNƏ DÜŞSƏYDİ....
Bu gün Azərbaycan Müdafiə Nazirliyi (MN) məlumat yayaraq bildirdi ki, aprelin 27-də axşam saatlarında Ermənistan hava hücumundan müdafiə bölmələri tərəfindən cəbhənin Xocavənd-Füzuli istiqamətində “OSA” zenit raket kompleksindən buraxılan idarəolunan raket heç bir hədəfə dəymədən nəzarətimizdə olan ərazidə boş sahəyə düşüb.
GoldNews.Az xəbər verir ki, əraziyə baxış keçirilərək 9M33M2 tipli raketin başlıq hissəsi və digər qalıqları tapılaraq götürülüb. İlkin araşdırma Ermənistan silahlı qüvvələrinin silahlanmasında olan raketlərin köhnə və istismara yararsız olduğunu göstərib.
MN-nin bu xəbərindən sonra ortaya çıxan əsas sual ondan ibarət oldu ki, əgər bu raket boş əraziyə deyil, yaşayış ərazilərinə düşsəydi, hansı fəsadlar törədərdi? Ümumiyyətlə, bu raketin xüsusiyyətləri nədən ibarətdir?
9M33M2 tipli raket 1975-1980-cı illərdə istehsal olunub. 1975-ci ildən etibarən hərbi bazara çıxarılıb. 9A33B tipli daşıyıcı texnikanın üzərində 6 ədəd 9M33M2 raketi qurulur. NATO sənədlərində bu silahdan "SA-8B Gecko Mod 0." deyə bəhs edilir.
9M33 uzunmənzilli raket kompleksidir. Raketlər 9K33M2 sistemi iləə idarə edilir. Tipinə görə, yerüstü raketlər qrupuna aiddir. Uzunluğu 3 m 158 sm-dir. Radio siqnalları vasitəsilə idarə edilir. Başlığı 13 kq-dır. 1.5-10 km-ə qədər məsafəni vura bilir. 25 metrdən 5 kilometrədək hündürlüyə qalxa bilir. Nişan surəti 500 km/saatdır.
