Deputat qardaşının nazir müavini təyin edilməsindən danışdı: "Mən fəxr edirəm ki..."

Millət vəkili Adil Əliyev qardaşı Məhərrəm Əliyevin ölkə başçısının ötən gün imzaladığı sərəncamla ədliyyə nazirinin müavini postuna təyin edilməsinə münasibət bilirib.

GoldNews.Az xəbər verir ki, deputat özünün şəxsi "facebook" səhifəsində bunları qeyd edib:

"Mən hesab edirəm ki, insan öz əqidəsini elan kimi divardan asmamalıdır. Məhərrəm Əliyevi tanıyanlar tanıyır, tanımayanlar üçün ərz edim ki, o heç vaxt yaltaq və ikiüzlü olmayıb, o vətəni, dövləti, xalqı uğrunda qan, dostu uğrunda göz yaşı, ailəsi uğrunda tər tökən əqidə adamıdır. Məhərrəm Əliyev vaxtında Ulu Öndər Heydər Əliyevin silahdaşı olub, bu gün də cənab prezident İlham Əliyevin sadiq generallarından biridir. Heç bir təmənna güdmədən, tutduğu vəzifədən asılı olmayaraq, vəzifədə olub-olmamasından asılı olmayaraq, o Prezident İlham Əliyevə, dövlətə və dövlətçiliyimizə sabit, stabil, sadiq adamdır. Heç bir qüvvə, heç vaxt onu əqidəsindən döndərə bilməz. Mən fəxr edirəm ki, Məhərrəm Əliyev kimi böyük qardaşım var. Allah böyüklərimizi qorusun".