Bakıda pulsuz "Wi-Fi" nöqtələri - REPORTAJ

Bakıda keçiriləcək IV İslam Həmrəyliyi Oyunlarınadək paytaxtın bir sıra ərazisində "İctimai İnternet" şəbəkəsi olacaq.

APA TV-nin xəbərinə görə, artıq təhlükəsizlik tədbirləri, eləcə də risklər nəzərə alınaraq aktiv zonalarda proqram təminatının tətbiqinə başlanıb. Yaxın zamanda pulsuz "Wi-Fi" istifadəçiləri yeni və daha rahat qeydiyyat sistemi ilə şəbəkəni aktiv edə biləcəklər.

Artıq avadanlıqlar quraşdırılıb. Tezliklə Dənizkənarı Milli Parkın "Ağ şəhər" ərazisində paytaxt sakinləri və şəhərimizin qonaqları pulsuz internetdən yararlana biləcək.

Bundan başqa, pulsuz internet "Sahil bağı" və Heydər Əliyev Mərkəzi ərazisində quraşdırılıb. Hazırda mobil telefon, notbuk, planşet və s. portativ cihazlarla şəbəkə siyahısından "Baktelecom"u seçməklə mobil nömrə vasitəsilə qeydiyyatdan keçib internetdən istifadə etmək mümkündür.

Bir necə ay öncə Dənizkənarı Milli Parkda və "İçərişəhər"də pulsuz internet əhalinin istifadəsinə verilib. İndiyədək pulsuz internetdən 100 minə qədər insan istifadə edib. Şəhərimizin sakinləri də, qonaqları da paytaxtın mərkəzində simsiz internetin istifadəyə verilməsini yüksək dəyərləndirir.

Qeyd edək ki, əhalinin sıx istirahət etdiyi digər parklarda da "İctimai İnternet" şəbəkəsinin quraşdırılması nəzərdə tutulur.