Azərbaycanda ət yenidən bahalaşdı - REPORTAJ

Süfrələrin vaz keçilməz neməti olan ətin qiymətində artım müşahidə edilir. Bahalaşmanın budəfəki ünvanı həm bölgələr, həm də paytaxtdır.

GoldNews.az xəbər verir ki, Quba mərkəzi bazarının ət satıcıları deyir ki, qiymətlər Ramazan bayramından sonra bahalaşıb.

Onların sözlərinə görə, bahalaşmanı əsasən qonşu Quba və Xaçmaz rayonlarında heyvan satışı və kəsimi ilə məşğul olan iş adamları yaradır. Onlar səhər tezdən gəlib heyvanı diri halda alır və qiyməti öz bazarlarında 11 manata çatdırırlar. Nəticədə ət qıtlığı yaranır və Quba bazarındakı satıcılar da qiyməti qaldırmağa məcbur olurlar: "Bayramdan sonra ümumilikdə burda qiymət artımı var. Təxminən 1 manat. Bunun da bəlli səbəbləri var. Ümumilikdə qiymət artımı ətin də qiymətinə təsir etdiyindən, alıcılarımızı da itirmişik. Yəni alıcılıq zəifləyib. Əvvəl bir dananı bir günə satırdıqsa, indi iki-üç günə satılır. Qiymət demək olar ki, bir neçə gündür belədir. Bu, yemin qiymətinin artması ilə əlaqədardır. Ot da çox bahadır. Bu da istər-istəməz qiymətə öz təsirini göstərir".

Ölkənin ikinci böyük şəhəri Gəncədə də qiymətlərlə maraqlandıq: "Yemin qiyməti hardasa iki dəfə qalxıb. Otun qiyməti keçən il bu vaxt 1.70 idi, indi 4.50 manata alırıq. Yəni yemin qiyməti bir ildə 3 dəfə bahalaşıb. Ətin kiloqramı isə 1 manat qalxıb. Arpanın da qiymətində dəyişiklik var. Keçən il bu vaxt yoncanı 2.50 manata alırdıq, heyvanı da 9 manatdan satırdıq".

Azərbaycanın ət bazarındakı qiymətlərin formalaşmasında həlledici rolu olan Qarabağ bazarlarındakı vəziyyətlə də tanış olduq: "Bizdə qiymət qalxmayıb. Qiymət 10 manatdır. Mal ətinin qiymətində dəyişiklik yoxdur. Elə quzu ətinin də qiyməti həmçinin. Amma elə vaxtlar olub ki, 8 manatdan satmışıq. Son dövrlərdə heyvanların qiymətinin qalxması birbaşa yemlə əlaqəlidir".

Paytaxt Bakıya gəlincə, qəssablar ətin qiymətində bahalaşma olduğunu təsdiqlədilər: "Mal ətinin qiymətində artım var. Təxminən 2-3 gündür qiyməti 50 qəpik - 1 manat arası qaldırmışıq. Bu da heyvan bazarında malın qıtlığı ilə əlaqədardır. Əsasən Beyləqandan gətiririk Bakıya. Son vaxtlar isə qıtlıq qiymətlərə təsir edir. Qıtlıqdan yaranan bahalıqdır. Əvvəllər yerli bazarlara Gürcüstan və Ukraynadan da heyvan gətirilirdi. İndi icazə yoxdur, yerli məhsullar isə bazarı tam təmin edə bilmir. Bu səbəbdən qiymət artımı təbiidir. Getdikcə də bahalaşacaq. Çünki yem bahadır. Hər şey bahadır. Bundan sonra da qiymət enməsi gözlənilmir".

İqtisadiyyat Nazirliyinin mətbuat katibi Abbas Əliyevin sözlərinə görə, Antiinhisar Siyasəti və İstehlakçılarının Hüquqlarının Müdafiəsi Dövlət xidməti süni qiymət artımı ilə bağlı məsələni araşdırır və məsələ qurum rəhbərliyinin diqqətinə çatdırılacaq.

Mütəxəssislər hesab edir ki, Azərbaycanda ilin istənilən fəslində təzə göy-göyərti, meyvə-tərəvəz tapmaq mümkün olsa da, təəssüf ki, əhali çox vaxt onunla qidalanmağa üstünlük vermir. Dəfələrlə deyilməsinə baxmayaraq, bizim qida rejimimizdə ət və ət xörəkləri aparıcı yer tutur.

Bir çox insanlar ət yeməyi olmadan doyumluq hissinin olmadığını deyirlər. Halbuki ətin çox qəbulu insan səhhəti üçün zərərlidir. Ətin tərkibində xolesterolun miqdarı yüksək olduğundan, ürək-damar xəstələrinə və qan təzyiqindən əziyyət çəkənlərə çox az miqdarda ət yemək tövsiyə edilir. Həkimlər heyvanların daxili orqanlarını da yeməməyi məsləhət görürlər. Qoyun və inəklərin böyrək, dalaq, ciyər kimi daxili orqanlarında mikrobların miqdarı daha çoxdur.

Həkimlərin sözlərinə görə, həftədə yalnız bir dəfə ət yemək məsləhətdir. Ətin insan orqanizminə verdiyi zərərlərin qarşıçısını almaq üçün meyvə və səbzələrdən istifadə etmək lazımdır.

APA TV