Aprel Qazilərimiz "Rembo" və Qoşqar Hacıyevin Gülhanədən görüntüləri yayıldı - FOTOLAR

Ankarada yaşayan bir qrup azərbaycanlı gənc Gülhanə xəstəxanasında müalicələri davam etdirilən qazilərimiz Qoşqar Hacıyev və Razi Cavadova baş çəkiblər. GoldNews.Az xəbər verir ki, görüşün təşkilatçılığını Ləman Süleymanlı həyata keçirib.

Redaksiyamıza daxil olan fotolardan da aydın görünür ki, hər iki qazinin müalicəsi davam etdirilir və vəziyyətləri normallaşır.

Qeyd edək ki, bir müddət əvvəl kütləvi informasiya vasitələrində Qarabağda döyüşlər zamanı gözündən qəlpə yarası alan hərbçi Qoşqar Hacıyevin müalicə xərclərini azərbaycanlı milyarder Mübariz Mənsimovun öz üzərinə götürməsi ilə bağlı xəbər yayılmışdı.

Yayılan məlumatda bildirilirdi ki, Mingəçevir şəhərindən olan Qoşqar Hacıyev bir müddət əvvəl müalicə alması üçün imkanlı şəxslərdən yardım istəyib. Bundan sonra Türkiyədə yaşayan iş adamı Mübariz Mənsimov ona yardım edib.

Məsələ ilə bağlı açıqlama verən aprel döyüşlərinin qəhrəmanı bu məlumatın yalan olduğunu bildirib: “O, yalan söhbətdir. Mənim xəbərim olmaya-olmaya yazmışdılar ki, Qoşqarın vəziyyəti pisləşib, xəstəxanaya götürüblər”.

Qoşqar Hacıyev müsahibəsində gələn ay Türkiyəyə müalicəyə gedəcəyini desə də, bunun Mübariz Mənsimovun vəsaiti hesabına reallaşmayacağını əlavə etmişdi.

“Mən Heydər Əliyev Fondunun prezidenti Mehriban xanım Əliyevanın təşəbbüsüylə gedirəm. Martın 1-nə biletlərimiz alınıb”.

Yaralı döyüşçü Müdafiə Nazirliyindən də narazılığını ifadə edib. “Müdafiə Nazirliyi məndən əlini çəkdi. Heç bir köməklik etmədilər. Cəmi bir dəfə Türkiyəyə göndəriblər. Nə edirsə, Mehriban xanım edir. Əhd eləmişəm, gələndən sonra əgər görüşdürsələr, onunla görüşəcəyəm.

Razi Cavadov da aprel döyüşlərində başından ağır yaralanıb. “Rembo” ləqəbli tankçı uzun müddət müalicə olunduğu xəstəxanada komadan ayılmamışdı.

Düşmənin snayper gülləsindən ağır zədə almış yaralı hərbçimiz aprel ayında 4 günlük müharibə zamanı düşmən gülləsinə tuş gəlmişdi. Hərbçimiz əvvəlcə Gəncədəki hospitala yerləşdirilmişdi. Ancaq onun vəziyyəti ağır olduğundan bir neçə gün sonra çətinliklə də olsa, Bakıya – Müdafiə Nazirliyinin Mərkəzi Hospitalına gətirilmişdi. Snayper gülləsi Razi Cavadovun gözünü və beynini dağıtdığından burada onun sol gözü əməliyyat olunmuşdu. Daha sonra, bu ilin yanvar ayının 4-də Müdafiə nazirliyi "Rembo"nu da müalicə üçün Gülhanəyə göndərmişdi.