Yol polisləri zəhərlənən gəncləri xilas etdi — VİDEO

Masallı rayonundan Lənkəran rayonuna istirahətə gedən üç gənc zəhərlənib.

GoldNews.az-ın ARB TV-yə istinadən verdiyi məlumata görə, hadisə Lənkəran rayonunun Liman şəhərindəki Nərimanabad qəsəbəsində qeydə alınıb.

Masallı rayonu, Həsənli kənd sakinləri, 1988-ci il təvəllüdlü Samir Hüseyn oğlu Abbasov, 1986-ci il təvəllüdlü Elşən Ədalət oğlu Hüseynov, 1988-ci il təvəllüdlü Fərid Sədrəddin oğlu Məhərrəmov Lənkərana çimərliyə gediblər. Onlar yolda marketlərin birindən kolbasa alıblar. Məhz həmin ət məhsulunu yedikdən sonra gənclər özlərini yaxşı hiss etməyiblər və yol-patrul xidməti əməkdaşlarının köməyi ilə onlar qida zəhərlənməsi diaqnozu ilə Lənkəran Rayon Mərkəzi Xəstəxanasına çatdırılıblar.

Xəstəxanadan verilən məlumata görə, zəhərlənən şəxslərin birinin vəziyyəti ağırdır, digərlərinin vəziyyəti isə orta-ağır olaraq qiymətləndirilir.

Hazırda onların müalicəsi Lənkəran RMX-nin İnfeksion xəstəliklər şöbəsində davam etdirilir.

Avtomobillə Ələt-Astara yolunda hərəkət edən gənclərin həyatını isə yol polis idarəsinin yol patrul xidməti alayının 11-ci tağımının əməkdaşları xilas ediblər.