Ümummilli liderin anım günündə Bakıda bəzi yollar bağlanacaq - Ziyarətçilər üçün istisna olacaq
Dekabrın 12-də ümummilli lider Heydər Əliyevin vəfatının 14-ci ildönümü və onun xatirəsinin yad edilməsi ilə əlaqədar keçiriləcək tədbirlərlə əlaqədar Bakıda bəzi küçə və prospektlərdə nəqliyyatın hərəkəti məhdudlaşdırılacaq. Bu barədə GoldNews.az-a Bakı şəhər BPİ Dövlət Yol Polisi İdarəsinin Yol Hərəkətinin Təhlükəsizliyinin Təbliği və İctimai qurumlarla Əlaqə bölməsinin rəisi, polis polkovniki Vaqif Əsədov məlumat verib.
Onun sözlərinə görə, ümummilli lider Heydər Əliyevin anım mərasiminə qatılacaq vətəndaşların, eləcə də yollarda hərəkətin təhlükəsizliyini təmin etmək məqsədilə dekabrın 12-də səhər saat 07:00-dan tədbir tam başa çatanadək Parlament prospekti boyu və onunla kəsişən küçələrdən Fəxri Xiyaban istiqamətində bütün nəqliyyat vasitələrinin hərəkətinə tam məhdudiyyət qoyulacaq və istiqamət dəyişdiriləcək:
"Paytaxtın Mehdi Hüseyn küçəsi 1 ünvanından, yəni "Teleteatr"ın inzibati binasının yanından, Mikayıl Müşfiq küçəsi ilə Hüseyn Cavid prospektinin kəsişməsindən, Mikayıl Müşfiq dairəsi ilə Mətbuat prospektinin kəsişməsindən, Abbasqulu Abbaszadə və İzzət Nəbiyev küçələrinin kəsişməsindən, Milli Məclisin arxasından Parlament prospekti istiqamətində ziyarət başa çatanadək nəqliyyatın hərəkəti məhdudlaşdırılaraq hərəkət istiqaməti dəyişdiriləcək. Lakin bir istisna var. Belə ki, ziyarətə gələnlər ictimai nəqliyyat vasitələrindən sərbəst istifadə edə bilərlər. Ona görə də həmin istiqamətdə ictimai nəqliyyat vasitələrindən istifadə edilməsini tövsiyə edirik.
Digər hallarda Fəxri Xiyaban və Parlament prospekti istiqamətində avtomobillərin hərəkətinə məhdudiyyət qoyulacaq və istiqamət dəyişdiriləcək. Ona görə də bütün sürücülərdən və avtomobil sahiblərindən xahiş edirik ki, bu istiqamətdə şəxsi avtomobillərindən mümkün qədər az istifadə etsinlər".
Bölmə rəisi həmçinin, mənzil başına çatmaq üçün sürücülərə alternativ yollardan istifadəni tövsiyə edib: "Yəni həmişə Parlament prospekti vasitəsilə Bayıl, 20-ci Sahə, Lökbatan, Qaradağ istiqamətində hərəkət edənlərin diqqətinə çatdırırıq ki, onlara Tbilisi prospektindən keçməklə 3-cü Kənar Dairəvi Yolla, yaxud Badamdar qəsəbəsindən, eləcə də Azneft dairəsindən keçərək Bayıl qəsəbəsi istiqamətində hərəkət etmələrinə şərait yaradılacaq".
