Silahlı qüvvələr hərəkətə gəlir, qarabağlılar devrilir - Sarkisyan dövrünə əlvida
Ermənistan Respublikasının prezidenti Serj Sarkisyanın sərəncamı ilə Artak Zakaryan Ermənistan müdafiə nazirinin birinci müavini, Artak Zakaryan isə müdafiə nazirinin müavini təyin olunub.
“Hər iki şəxs 6 may 2012-ci il Ermənistan parlamentinə keçirilmiş seçkilər zamanı Ermənistan Respublikaçılar Partiyasının (ERP) namizədi kimi deputat seçilmişlər. Hər iki şəxs Ermənistanın Azərbaycana qarşı aktiv hərbi işğalçılıq siyasətinin başlandığı 1988-1994-cü illərdə Ermənistan ordusunda və erməni hərbi birləşmələrində xidmət etməyiblər. Ermənistanın keçmiş müdafiə naziri Seyran Ohanyanın istefaya göndərilməsindən sonra prezident Sarkisyan ciddi şəkildə orduda mövqelərini gücləndirmək fəaliyyətinə girişib. Ayrıca Sarkisyan ordu rəhbərliyinə mülki şəxsləri gətirməklə ordunu keçmiş döyüşçü komandirlərdən təmizləyir. Yaxın tarixdə keçmiş döyüşçülərin Sarkisyan hakimiyyətinə qarşı silahlı etirazları, keçmiş döyüşçü Jirayr Sefilyanın, Samvel Babayanın qondarma səbəblərlə həbsi bir daha onu göstərir ki, Sarkisyan keçmiş döyüşçü komandirlərə və ictimai-siyasi xadimlərə etibar etmir”.
Bunu hərbi-siyasi icmalçı Nəriman Qarayev a24.az-a açıqlamasında deyib.
Ermənistanda hərbi çevriliş gözlənilir
“Ermənistan siyasi həyatında yaxın gələcəkdə silahlı çevrilişin olacağı istisna deyil. Belə ki, Rusiyanın 102-ci hərbi bazasi ilə Ermənistan ordusunun 4-cü korpusunun birlikdə təşkil etdiyi hərbi birlik məhz bu məqsədlə yaradılmışdır. 102-ci hərbi bazanın yarandıldığı gündən etibarən NATO qüvvələrinə qarşı tədbir olduğu məlumdur. Bazaya ən yaxın adekvat NATO hərbi birləşmələri Türkiyə ərazisində yerləşir. Yaxın keçmişdə Türkiyə ilə Rusiya arasında yaşanmış gərginlik son zamanlar yumşalaraq mehriban qonşuluq fazasına keçib. Belə olan halda bəzi ekspertlərin qeyd etdiyi kimi Rusiyanın Ermənistanın Gümrü şəhərindəki 102-ci hərbi bazası ilə Ermənistan MN-nin 4-cü korpusunun birləşdirilməsi Türkiyəyə qarşı yönəlməyib. Birgə hərbi birlik heç NATO-ya qarşı da atılmış addım deyil. Çünki Ermənistan MN-nin 4-cü korpusunun şəxsi heyəti və sahib olduğu hərbi texnika buna imkan vermir. Çünki Ermənistan ordusunun Yeğeqnadzorda (əvvəlki adı Dərələyəz) yerləşən 4-cü korpusu Rusiya ordusunun motoatıcı diviziyası səviyyəsiylə belə ölçülmür, hətta Rusiya ordusunun əlahiddə briqadası səviyyəsində komplektasiya olunmayıb. 4-cü korpusun tərkibinə 1 motoatıcı alay (Ermənistanın Vayk yaşayış məntəqəsində yerləşir), 1 özüyeriyən artilleriya divizionu və 1 rabitə batalyonu daxildir. Bu komplektasiya ilə 4-cü korpusun 102-ci bazaya dəstəyini ekspertlər belə istehzailə qarşılayır. Cəmi 4 min şəxsi heyətilə 102-ci baza Ermənistan ordusunun tamamından artıq döyüş qabiliyyətinə malik hərbi texnika və sursatla təmin olunub. Bu da o deməkdir ki, yaradılan hərbi birlik Rusiyanın Ermənistana yox Ermənistanın Rusiyaya ehtiyacından ərsəyə gəlib”.
Rusiyanın Ermənistandaki 102-ci hərbi bazası ilə Ermənistan ordusunun 4-cü korpusundan ibarət hərbi birliyin Azərbaycana qarşı yönəlmə imkanı varmı?
“Beynəlxalq hüquqa görə belə bir təhdid Azərbaycan üçün mövcud deyil. Rusiya ilə Ermənistan arasında imzalanmış dövlətlərarası müqavilələrə görə yalnız 3-cü ölkənin hərbi təcavüzü nəticəsində Rusiyanın münaqişəyə müdaxiləsi mümkündür. Azərbaycanın Ermənistana hər hansı şəkildə hərbi təcavüzü olmadığı üçün Rusiyanın Qarabağ münaqişəsində Azərbaycana qarşı hərbi müdaxiləsi mümkünsüzdür. Belə olan halda birgə hərbi birləşmənin yaradılmasının məqsədi nədir? Suala cavab tapmaq üçün Ermənistan cəmiyyətində baş verən siyasi proseslərə nəzər yetirmək kifayətdir. Belə ki, son zamanlar erməni diasporu ilə Sarkisyan hakimiyyətinin arasında ciddi soyuq münasibətlər yaranıb. Erməni diasporunun ən hərbiləşmiş icması sayılan Livan erməni icması ilə Sarkisyan höküməti arasındakı münasibətlər silahlı münaqişə həddinə qədər çatıb. Livan ermənisi, keçmiş döyüşçü Jirayr Sefilyanın həbsi, 2016-cı ilin iyulun 17-də 30-a qədər keçmiş döyüşçülərdən ibarət “Sasna crer” hərbi-siyasi qrupun (J.Sefilyanın layihəsidir) silahlı üsyanı, əsasən diaspor ermənilərindən ibarət “ORO” siyasi blokunun Sarkisyanla siyasi mübarizəsi onu göstərir ki, erməni diasporu Serj Sarkisyan hakimiyyətinə bütün mümkün vasitələrlə son qoymaq niyyətindədir. Belə olan halda Sarkisyan hakimiyyətinin söykənəcəyi yeganə qüvvə Rusiya siyasi hakimiyyətidir. Mozaikadakı parçalar yerinə qoyulduğu zaman Ermənistan ordusunun 4-cü korpusu ilə Rusiyanın Ermənistandakı 102-ci hərbi bazasının birgə hərbi birliyinin yaradılmasının əsl səbəbinin şəkli görünməyə başlayır. Səbəb Ermənistanda Sarkisyan hakimiyyətinə qarşı baş verəcək mümkün silahlı üsyanı yatırmaq üçün Rusiyanın birbaşa hərbi müdaxiləsi üçün zəmin yaratmaqdır. Son olaraq qeyd edək ki, Ermənistan ordusundakı istefalar keçmiş müdafiə naziri Seyran Ohanyanın kadrlarının, Jirayr Sefilyana simpatiyası olan keçmiş döyüşçü komandirlərin ordudan tamam təmizlənməsinə qədər davam edəcək”.
