Ölkəsinin ən gözəl qızı seçilən əsgər orduya üsyan etdi - "İllərcə cinsi təcavüzə məruz qaldım"

"Əsgər Barbi" olaraq adlandırılan və 2009-cu ildə İngiltərə gözəli seçilən Keterina Hodge orduda xidmət etdiyi 12 il boyunca oğlan əsgərlərin ona hücum etdiklərini bildirib.

GoldNews.Az xəbər verir ki, Hodge 17 yaşında olarkən orduda xidmət etməyə başlayıb. 18 yaşında İraqdakı bölüyündə əsgərlərlə birlikdə bir hərbiçini Bəsrədəki bazaya apararkən qəza edib. Qəzadan sonra əlinə iki tüfəng alan hərbiçinin üzünə yumruq vuran Hodge onu tərki-silah edib və bu cəsarətinə görə mükafata layiq görülüb. Bundan sonra gənc qız üçün orduda cəhənnəm həyatı başlayıb.

Hazırda 30 yaşında olan Hodge "Mirror" qəzetinə verdiyi açıqlamasında digər qadın əsgərləri cəsarətləndirmək üçün artıq susmayacağını söyləyib. O, "2018-ci ildəyik, qadınların bu şəkildə alçaldılması qəbuledilməzdir. Bu tamamilə cinsi ayrı-seçkilikdir" deyib.

Bölüyündəki bir qrup əsgərin sırf qadın olduğu üçün mükafat aldığını düşündüyünü və bu səbəblə ona hücum etdiklərini söyləyən Hodge "Qorxulu idi. Yanlarından keçərkən mənə alçaqca adlar taxaraq fısıldayır, "fahişə", "sürtük", "yalançı" kimi sözlər deyirdilər. Bir dəfə yeməkxanaya getdim, başıma kola butulkası atdılar. Hər kəsin içərisində ağlamamaq üçün özümü güclə saxladım, otağıma gedəndə göz yaşlarıma boğuldum. Buna görə də orda yemək yeyə bilmirdim. Ola biləcəklərdən qorxurdum. Marketdən bir şeylər alaraq otağımda yeyirdim" deyə bildirib.