Nadir xatirə sikkəsi Türkiyədə rekord qiymətə satışa çıxarıldı

Nadir xatirə sikkəsi kolleksiyaçılar arasında ajiotaja səbəb oldu

Türkiyədə kolleksiyaçılar tərəfindən yüksək qiymətləndirilən nadir xatirə sikkəsi onlayn satış platformasında rekord məbləğə təklif olunur. Söhbət Türkiyə Böyük Millət Məclisinin 50 illik yubileyi münasibətilə buraxılmış, 16 qram çəkisi olan gümüş 25 lirəlik sikkədən gedir. Bu nadir nümunəyə 66 min 500 türk lirəsi qiymət qoyulub.

İstehsal qüsuru sikkənin dəyərini artırıb

Satışa çıxarılan sikkənin dəyəri onun istehsalındakı nadir qüsurla əlaqələndirilir. Atatürk portretinin göz hissəsində fərqlilik – sol gözün böyük, sağ gözün isə kiçik və qapalı təsvir olunması – kolleksiyaçılar tərəfindən xüsusilə qiymətli sayılır. Belə nümunələr bazarda adi sikkələrdən qat-qat baha satılır.

Kolleksiya bazarında maraq artır

Numizmatika üzrə mütəxəssislər bildirirlər ki, istehsal səhvləri olan sikkələr uzunmüddətli dövrdə daha yüksək qiymətlərlə alınıb-satılır. Bu səbəbdən bəzi kolleksiyaçılar həmin sikkələri investisiya məqsədilə əldə edirlər. Hazırda satışda yalnız bir ədəd olan bu nadir nümunəyə pulsuz çatdırılma imkanı da təklif edilir.