Müəllimlərin iş yerinin dəyişdirilməsi hansı formada həyata keçiriləcək? - NAZİRLİKDƏN AÇIQLAMA

“2013-cı ildə ölkə başçısı tərəfindən Azərbaycan Respublikasında təhsilin inkişafı üzrə dövlət strategiyası təsdiq edilib. Burada beş başlıca strateji istiqamət müəyyən olunub ki, onlardan da biri təhsil verənlərin peşəkarlıq səviyyəsinin artırılması, müasir təlim metodlarından istifadə edən yeni təhsil verənlərin formalaşdırılmasıdır”.

GoldNews.Az xəbər verir ki, bu fikri açıqlamasında Təhsil Nazirliyinin İnsan resursları şöbəsinin müdir müavini Eşqi Bağırov deyib. O, bildirib ki, strateji istiqamətin icrası ilə bağlı Təhsil Nazirliyi tərəfindən mütəmadi olaraq layihələr həyata keçirilir: “2010-cu ildən müəllimlərin işə qəbulu mərkəzləşdirilmiş müsabiqə yolu ilə həyata keçirilir. Hər il Təhsil Nazirliyi tərəfindən yeni qaydalar işlənir, təsdiq edilir. Bu il də mayın 15-də nazirin 54 nömrəli əmri ilə Təhsil Nazirliyinin sisteminə daxil olan ümumtəhsil müəssisələrində çalışan müəllimlərin bir məktəbdən digərinə iş yerinin dəyişdirilməsi, eyni müəllim kadrların işə qəbulu qaydaları yenidən hazırlanıb, təsdiq edilib. Həmin qaydalarda əvvəlki illərlə müqayisədə bir neçə yeniliklər nəzərdə tutulub. Yeniliklərdən ən başlıcası ondan ibarətdir ki, əgər əvvəlki illərdə müəllimlərin şəhər və ya rayon daxilində iş yerinin bir məktəbdən digərinə dəyişdirilməsi, yerli təhsil idarəetmə orqanlarına aid edilmişdisə, yeni qaydalara əsasən həmin səlahiyyət birbaşa Təhsil Nazirliyinə aid olacaq.

Ən çox verilən sual odur ki, bu qayda hansı formada həyata keçiriləcək? Müsahibə və müsabiqə keçirilməyəcək. Hazırda nazirlikdə proqram təminatı hazırlanır. Proqram təminatında hər bir namizəd müəllim öz sosial statusu ilə bağlı qeydlər aparacaq, iş yerinin dəyişdirilməsini əsaslandıracaq, buna aid olan sənədləri həmin proqram təminatına yükləməklə elektron ərizə ilə müraciət edəcək. Və nazirlikdə yaradılan işçi qrupu tərəfindən həmin namizədlərin məlumatları qiymətləndiriləcək, kimin hansı məktəbə iş yerinin dəyişdirilməsi ilə bağlı qərar qəbul ediləcək”.

E.Bağırov bildirib ki, burda müəllimlərin sosial statusu ilə yanaşı eyni zamanda qiymətləndirmə aləti kimi də onların diaqnostik qiymətləndirmədə göstərdikləri nəticə də nəzər alınacaq.

“İctimaiyyətə məlumat tam olduğu kimi çatdırılmasını istəyirik. Yəni qiymətləndirmənin nəticəsi qərarverici amil deyil. Müəllimlərin yer dəyişdirilməsi, qiymətləndirmə üçün başlıca səbəb onların sosial statusudur. Məsələn, müəllimlərin ailə vəziyyəti, onların sağlamlığı və digər amillərlə bağlıdırsa, biz daha çox buna üstünlük verəcəyik.

Eyni zamanda, əgər bir məktəbdə eyni vakant yer üçün namizədlərin sayı çoxdursa, təbii ki onların akademik göstəricisi (diaqnostik qiymətləndirmədə göstərdiyi nəticə) nəzərə alınacaq.

Bir şəhər məktəbindən digər şəhər məktəbinə iş yerinin dəyişdirilməsi də proqram təminatı vasitəsi ilə eyni qaydada aparılacaq. Yeniliklərdən biri də ondan ibarətdir ki, biz artıq işə qəbul müsabiqəsində müəllimlərin göstərdiyi nəticələri növbəti tədris ili üçün keçiriləcək müsabiqəyə kimi qüvvədə saxlayırıq.

Yəni 2016-2017-ci il tədris ili üçün keçirilən müəllimlərin işə qəbul müsabiqəsində test imtahanında keçid balını toplayan namizədlər imtahana gəlmədən, birbaşa müsabiqənin üçüncü mərhələsi olan vakansiya seçiminə qoşula biləcəklər.

Əvvəlki ballara uyğun vakant yeri seçib, uğur qazandıqları halda, yəni vakansiyanı tutmaq hüququnu əldə etdikdən sonra müsahibə mərhələsinə də dəvət olunacaqlar”.

E. Bağırov söyləyib ki, nazirlik tərəfindən aparılan diaqnostik qiymətləndirmə artıq başa çatmaq üzrədir:

“Bakı şəhərində, Abşeron rayonunda, Sumqayıt şəhərində yerləşən məcburi köçkün rayonlarında çalışan 5 minə yaxın müəllimlərin qiymətləndirilməsi həyata keçirilir. Qiymətləndirməyə qeyd etdiyim rayonlarla yanaşı, əvvəlki illərdə müxtəlif səbəblərdən bu prosessə iştirak edə bilməyən namizədlər də cəlb olunurlar. Qiymətləndirmə başa çatdıqdan sonra ölkə üzrə bütün müəllimlərin nəticələri bizim əlimizdə olacaq. Həm diaqnostik qiymətləndirmənin keçirilməsi qaydalarında, həm də nazirliyin yerli təhsil idarəetmə orqanları ilə görüşləri zamanı tövsiyə və tapşırıqlarımızda hər dəfə qeyd edirik ki, bu qiymətləndirmənin nəticələri müəssisə rəhbərlərinin əlində alət olmalıdır. Müəssisə rəhbəri dərs bölgüsünü aparan zaman, hansısa mükafatlandırma tədbiri həyata keçirəndə bu qiymətləndirmənin nəticəsini alət kimi istifadə etməlidir. Aşağı nəticə göstərən müəllimlərimiz daha az dərs yükü ilə təmin olunmalıdır. Yüksək nəticə göstərən müəllimlərimiz isə buna müvafiq olaraq yüksək dərs yükü ilə təmin edilməlidir. Bu da müəllimin həm də sosial rifahına təsir edən amillərdən biridir. Keçid balından da aşağı nəticə göstərən müəllimlərimiz var. Təbii ki, onların sayı çox olmasa da mövcuddurlar. Bu artıq elə bir kateqoriyada olan müəllimlərdir ki, təlimlərin də onların inkişafına təsiri olmayacaq. Biz bu kateqoriyadan olan müəllimlərin dərs yükünün minimuma endirilməsinin tərəfdarıyıq. Yaxşı olar ki, onlar işdən azad olunsunlar”.

Onu da qeyd edək ki, nazirlik rəsmisi konkret olaraq rəqəm açıqlamasa da əldə etdiyimiz məlumata görə, diaqnostik qiymətləndirmənin nəticəsində keçid balını keçməyən müəllimlərin sayı minlərlədir. Hazırda onların dərs dedikləri təhsil müəssisəsindən uzaqlaşdırılması istiqamətində işlər aparılır. Bunu Təhsil Nazirliyinin sosial şəbəkələrdəki səhifələrindən də görmək olar ki, zəif nəticə göstərən müəllimlər artıq özlərini müxtəlif yollarla müdafiə etməyə cəhd göstərirlər. Məlumata görə, həmin müəllimlərin bir qisminin heç ali təhsili də yoxdur. Onların müəllim kimi işə düzəlməsində isə yerli təhsil idarəetmə orqanlarının və müəssisə direktorlarının əli olduğu bildirilir. Hazırda Təhsil Nazirliyi tərəfindən həmin müəllimlərə qarşı ciddi addımlar atılır. Məlumata görə yerlərdə direktorlar bəzi şəxslərdən pul alıb, onları sənədlərdə xadimə, texniki işçi kimi göstərsələr də, əslində müəllim kimi auditoriyaya buraxıb, dərs saatları veriblər. (Yeni Müsavat)