"Müəllimlərə torpaq sahələri verilməli, nəqliyyat xərcləri qarşılanmalıdır"
“Qüvvət elmdədir başqa cür heç kəs, Heç kəsə üstünlük eyləyə bilməz”
Bu fikirləri hələ XII əsrdə dahi Nizami demişdi. Mütəfəkkirlərimiz bəşəriyyətin xilasının elmdə, təhsildə olduğunu dəfələrlə, hər əsrdə, hər əsərdə vurğulayıblar. Bəs bu gün təhsilimiz nə vəziyyətdədir? Xüsusən bölgələrdə təəssüf ki, kadr çatşmazlığına görə sistemdə xeyli boşluqlar yaranır. Məsələn, elə kəndlərimiz, rayonlarımız var ki, ingilis dili dərsi müəllim qıtlığından Azərbaycan dili və ədəbiyyat müəllimi tərəfindən tədris olunur. Və 21-ci əsrdə, inkişaf etmiş bir dövlətdə bu kimi neqativ halların olması təbii ki, qəbulolunmazdır.
Lakin Təhsil Nazirliyinin Mətbuat Xidmətinin rəhbəri Cəsarət Valehov bununla razılaşmır: “Kadr çatışmazlığı haqda 3-5 il əvvəl danışa bilərdik.
Ancaq indi vəziyyət tam başqadır. Əksinə bölgələrimizdə müəllim olmaq üçün bakalavrlar arasında “yarış” gedir”, deyə bildirib.
Təhsil eksperti Etibar Əliyev açıqlamasında məsələyə belə münasibət bildirib:
“Müəllimlərin bölgələrdə qalıb işləməsi üçün xeyli sayda stimullaşdırıcı tədbirlər görülmüşdü. Hətta buna müvafiq olaraq Nazirlər kabinetinin qərarı da var. Lakin təəssüflər olsun ki, bölgələrdə məktəblərin müəllimlərlə tam təminatı lazımi səviyyədə həyata keçirilmədi. Əslində bölgələrin müəllimlə təminatı məsələsini təhlil etdikdə görürük ki, bu problemin kökü ali məktəblərdə müəllimlik peşəsinə aşağı dəyər verilməsi ilə bağlıdır.
Belə ki, əksər abituriyentlər üçün müəllimlik peşəsi universitet təhsili almaq məqsədilə seçilmiş peşədir. Əslində isə bu ixtisasın keçid balı hər ixtisasdan yüksək olmalıdır. Mən hesab edirəm ki, xüsusən, bölgələrdə çalışan müəllimlər üçün stimullaşdırıcı tədbirlərin sayı artırılmalıdır. Onlara torpaq sahələrinin verilməsi, nəqliyyat xərclərinin qarşılanması və s. bu kimi tədbirlər görülə bilər ki, bu da məsələnin həllinə öz müsbət təsirini göstərə bilər.
Bir də düşünürəm ki, problemin digər həlli də universiteti bitirən tələbələrə təyinat verilməsi ilə bağlı ola bilər. SSRİ-nin vaxtında universitetlərdə təyinatlar olurdu. Bu zaman bölgələrə ezam olunanlar əksər vaxtlarda elə orda da evlənib yaşayırdılar. Belə olduqda da kəndin infrastrukturu genişlənirdi”.
Mənbə: qaynarinfo
