Mübariz Mənsimovdan Prezident İlham Əliyeva 11 aprel dəstəyi

"Palmali Holding"in prezidenti, iş adamı Mübariz Mənsimov Azərbaycanda prezident seçkilərinin daha erkən tarixdə keçirilməsinə münasibət bildirib.

GoldNews.Az xəbər verir ki, Mənsimov habertürk-ə açıqlamasında Azərbaycanda prezident seçkilərinin aprel ayına təyin olunması qərarını doğru bir addım kimi dəyərləndirib.

Azərbaycan üçün önəmli dövlətlərdən olan Rusiyada da bu il oxşar bir seçimin olacağını, Türkiyədə isə gələn il seçkilərin keçiriləcəyini xatırladan Mənsimov, səsvermənin 11 apreldə baş tutması haqqında qəbul edilən qərarın regional durumla da uyğunluq təşkil etdiyinə işarə edib.

Prezident İlham Əliyevin hakimiyyətə gəldiyi gündən bu yana Azərbaycanı həm daxili və xarici siyasət, həm də izlədiyi iqtisadi xətti ilə irəliyə daşıdığını vurğulayan Mənsimov, "Beynəlxalq aləmdəki iqtisadi böhrana rəğmən, Azərbaycanda pul rezervi əsaslı şəkildə artır. Bu, önəmli bir faktdır. Daha öncə də demişdim, əslində siyasətdən danışmaq iş adamının vəzifəsi deyil, ancaq mənim bir səsim var, hər zaman olduğu kimi və hər azərbaycanlı vətəndaş kimi sandıq başına gedərək, İlham Əliyevə verəcəyəm", - deyib.

İş adamı onu da vurğulayıb ki, Türkiyə və Azərbaycan arasındakı qardaşlıq münasibətlərinin bu seçimdən sonra daha da güclənəcəyinə inanır.