Messinin toyunda İsrail agentləri - Mafiya, polis, gizli qruplaşmalar...

Argentina ilin toyuna hazırlaşır.

GoldNews.Az xəbər verir ki, Barselona klubunda oynayan Messi və sevgilisi Antonella Roccuzzo 30 iyunda evlənəcək. Cütlük Rosarioya uçaraq toyun son hazırlıqları ilə məşğul olmağı planlaşdırır. Bu toy üçün hazırlıq edən tək onlar deyil: İsrail agentləri, bir narkotik karteli və Argentina polisi də siyahıya daxildir.

Niyə Rosario?

12 ildir ki, Barselonada yaşamalarına rəğmən, Messi və Antonella Rosarioda evlənmək qərarı verib. Köklərindən qopmayan ikilinin toy hazırlıqlarında bəzi dəyişikliklər edilib. May ayında toya dəvət ediləcək qonaqların sayının 600 nəfər olacağı açıqlansa da, həmin siyahıdakı qonaq sayı 250-yə endirilib.

Kimlər dəvətlidir?

Toyun təşkilatçıları və fotoqrafların hamısı Rosariodan seçilib.

Toyun birinci mərhələsi şəhər kilsəsində baş tutacaq. Ardınca isə "Casino Hotel"də parti təşkil ediləcək.

Dəvətlilər arasında Argentinanın futbol üzrə millisinin bir neçə üzvü və barselonalı futbolçular- Neymar, Suarez, Pike, Ter Stegen, Busquets və Iniesta da yer alır.

1.2 milyon əhalisi olan Rosario üçün Messinin toyu çox böyük əhəmiyyət daşıyır. Paytaxt Buanes-Ayresin 310 km kənarında yerləşən Rosario Che Guevara, Marcelo Bielsa, Cesar Menotti kimi məşhurların doğulduğu bölgədir. Onlar arasında Messi də var və futbolçu doğulduğu şəhərə öz borcunu ödəyir.

Toyla bağlı önəmli və təhlükəli daha bir məlumat da var.

Toyun rəsmi hissəsindən sonra parti veriləcək "City Hotel Casino" La Granadada yerləşir. Bu səmt şəhərin ən təhlükəli bölgəsidir. Səbəbi isə bu ərazilərin "Los Monos" (meymunlar) olaraq tanınan narkotik qruplaşması tərəfindən idarə olunmasıdır. Buna görə ən yüksək səviyyədə təhlükəsizlik tədbirləri görüləcək.

Argentina mediasında yer alan xəbərlərə görə, Messinin ailəsi israilli bir təhlükəsizlik firması ilə razılığa gəlib. Yerli əhalinin məlumatına görə, israilli agentlər La Granada bölgəsini indidən nəzarətə götürüblər. Onlara Santa Fe və Rosario polisi də yardımçı olur.

Toy üçün 150 media nümayəndəsi akkreditasiya olunub. Onlar sadəcə otelin qapısının önündə dayana biləcəklər. İçəriyə girməyə icazə verilməyəcək.