İranlı turistlər Bakı hovuzlarında - "Akvaparklarınız çox gözəldir"- VİDEO

Hazırda insanlar istirahət üçün daha çox çimərliklərə və müxtəlif istirahət mərkəzlərindəki hovuzlara üz tutur.

GoldNews.az xəbər verir ki, çimərliklərdə yaşanan problemləri dəfələrlə işıqlandırmışıq. Bəs hovuzlarda vəziyyət necədir? Ümumiyyətlə, istirahət mərkəzlərində, akvaparklarda, hotellərdəki hovuzlarda təmizliyə necə riayət olunur, təhlükəsizlik məsələləri necə tənzimlənir?

Ekspert Elmar Nurəliyevin dediyinə görə, təhlükəsizliyi yüksək şəkildə təşkil edən istirahət mərkəzləri də var, aşağı səviyyə də olanlar da. Yəni vəziyyət məkana görə dəyişir. O bildirib ki, su hovuzları və idman sağlamlıq kompleksləri ilə bağlı Nazirlər Kabinetinin müvafiq qərarında sözü gedən məsələ ilə bağlı qaydalar öz əksini tapıb: "Təbii ki, hovuzlarda azyaşlılarla böyüklərin bir yerdə çimməsi orada qadağan olunur. İçkili halda hovuza girmək qadağandır. Hovuza girməzdən qabaq gigiyenik qaydalara əməl olunmalıdır. Duş qəbul olunduqdan sonra hovuza girilməlidir. Yoluxucu xəstəliklər olduqda, hovuza girmək məsləhət deyil. Hovuza girməzdən əvvəl orada hovuzlarda hansı təhlükəsizlik qaydalarına riayət olunmalıdır, bunları oxumalıdır. Böyüklər üçün 1 nəfər üçün 5 kv. metr nəzərdə tutulub. Azyaşlılar üçün bu, 4 kv. metrdir. Olmaz ki, böyük bir hovuza, 100 kv. m hovuza 100-200 adam girsin. Həmin o hovuza nəzarət edən adamlar buna məsuliyyət daşıyır. Zəif nəzarət olunan yerlər, təbii, qaydalara əməl etmir. Problemlər həmin yerdə olur".

Qaydalara riayət olunub-olunmamasını öyrənmək üçün bir neçə məkana baş çəkdik.

İstirahət mərkəzlərindən birinin inzibati işlər üzrə meneceri Cəmilə Əhmədova bildirdi ki, fəaliyyət göstərdikləri istirahət mərkəzində 2 böyük və 1 uşaq hovuzu istifadəyə verilib: "Hər hovuzumuzun öz xilasediciləri var. Daima nəzarətdədirlər. Hər gün axşam akvapark bağlandıqdan sonra suyun dərmanlanma prosesi başlayır. Xlorlanmar, digər dərman vasitələri ilə təmin olunma həyata keçirilir. Hər gün saat 9-da filtrasiyamızı dayandırırıq. Axsam saat 8-də akvapark bağlanan kimi filtrasiyanı qoşuruq. Bizim hovuzlarda elektrik məsələlərində problem olmasın deyə, işıqlandırma sistemi yoxdur. Akvaparkda olan attraksionları da daim nəzarətdə saxlayırıq".

Növbəti istirahət mərkəzinin nümayəndəsi Davud Cəlilov da təhlükəsizliyin yüksək səviyyədə təmin olunduğunu bildirdi: "FHN-in icazəsi ilə burada daxili işçilərimiz, canqurtaranlarımız olmaqla təhlükəsizliyi 100 faiz təmin edirik. Uşaqlar üçün burada dalğa hovuzu, böyüklər üçün isə böyük hovuzlar fəaliyyət göstərir. Uşaqlar üçün olan hovuza böyüklərin girişi qadağandır. Həmçinin də uşaqların böyük hovuza girişi qadağandır. Sular tam şəffaf olaraq təmizlənir. Həm çimərliklərdə, həm də hovuzda monitorinqlər aparılır".

Kadrlardan da göründüyü kimi, əcnəbilər, xüsusi ilə də İrandan gələn turistlər ölkəmizdə özlərini çox rahat hiss edir. Fürsətdən istifadə edib, bir neçə xarici turistlə söhbətləşdik. Bildirdilər ki, bu kimi yerlərdə təhlükəsizlik məsələlərini özləri də diqqətdə saxlayır: "Mən İrandan gəlmişəm. Burada hər şey yaxşıdır. Bir həftədən çoxdur burdayam. Burdakı akvapark çox yaxşıdır. Hər kəs burada özünü təhlükəsiz hiss edir. Buradakı insanlar da yaxşıdır. Mən də sizi İranda görməyə şad olaram".

Bu, bizim apardığımız müşahidələr idi. Seçim isə sizə qalır. Təhlükəsizliyə əməl edib öz sağlamlığınızı qorumaq, ya da məsuliyyətsizlik edib xoşagəlməz hadisələrlə qarşılaşmaq...

APA TV