"Halal nemət min bərəkət" iddialara cavab verdi: "Bu, mümkün deyil! "

Ötən gün “Halal nemət min bərəkət” sosislərinin içərisindən siçan nəcisinin çıxması ilə bağlı xəbər yayımlanıb.

Bu barədə məlumatı isə Rəhim İsmayılov adlı şəxs “Baku.ws” saytına göndərib. Hamilə olan yoldaşına mağazadan “Manqalüstü” sosislərini alarkən içərisindən siçan nəcisinin çıxdığını iddia edən şəxs məhsulun fotosunu da çəkib.

“A24.az” yazılan iddialara aydınlıq gətirmək üçün “Halal nemət min bərəkət” şirkəti ilə əlaqə qurub. Şirkətin Keyfiyyətə Nəzarət Departamentinin müdiri Yusifzadə Şəhla açıqlamasında siçan nəcisinin məhsula düşmə ehtimalının sıfıra bərabər olduğunu bildirdi:

“Siçan nəcisinin məhsula düşmə ehtimalı sıfıra bərabərdir. Çünki bizim müəssisədə 2011-ci ildən İSO 22000 – “Təhlükəsizlik Sistemlərinin İdarə Olunması” tətbiq olunur. Burda “Best Control” deyilən prosedurumuz var, yəni ziyanvericilərlə mübarizə proseduru. Hazırda bizim 4 dövlət qurumu ilə müqaviləmiz var. Bundan başqa, müəssisəmizdə Abşeron rayon baytarlıq mərkəzinin nümayəndəsi əyləşib. Bizim özümümüzün də baytar həkimimiz var.

Hər həftənin iki günü, xüsusən də 5-ci günlər bizim müəssisədə təmizlik günüdür. Həmin gün müəssisəmiz işləmir, bütün həyətyanı ərazilər, avadanlıqlar, zavodun daxili dezinfeksiya olunur. Burda hər bir ziyanvericinin özünə uyğun dərmanlar var. Bundan başqa, ayda bir neçə dəfə dövlət qurumlarından müəssisəmizə gəlib, nəzarət edirlər. Ona görə də bizim müəssisəyə hansısa ziyanvericinin girməsi mümkün deyil.

İkincisi, gəlin belə bir ehtimal yürüdək ki, məhsulun içərisinə siçan nəcisi daxil olub. Onu deyim ki, müəssisəmizdə kolbasa hazırlanan texnoloji qurğunun dişləri elə sürətlidir ki, ora diri bir şeyin girməsi və ya həmin nəcisin orda qalması mümkün olan bir şey deyil. Hətta bundan sonra kolbasa məhsulu bir neçə emal prosesi keçir. Kolbasalar bişirilir, hisə verilir, qızardılır, qaynadılır, buxara verilir və sair.

Üçüncüsü, gülməli məsələdir, yazılan iddiada ad yazılıb, amma ünvan, əlaqə vasitəsi qoyulmayıb. Bəs iddiada adı çəkilən sosiska hansı tarixdə istehsal olunan məhsulumuzdur? Bunlar haqda heç bir məlumat verilməyib. İstənilən adam qara nöqtəni məhsulun üzərinə qoyub şəklini çəkə bilər.

Bundan başqa, bu kimi iddiaları təyin eləmək üçün dövlət qurumu var- Səhiyyə Nazirliyinin Gigiyena və Epidemiologiya Mərkəzi. Həmin məhsulu bizə təqdim edərdi, araşdırılması üçün biz də aparıb həmin mərkəzə analiz verərdik və dəqiq bilinərdi. Yalnız həmin dövlət qurumunun hüquqi cəhətdən səlahiyyəti çatır ki, məhsulda aşkar edilən yad cismi müəyyən etsin, onun ora necə gəlib düşdüyünü araşdırsın.