Dəhşətli Xocalı xatirəsi: "Uşaq 3 gün idi ki, donub ölmüşdü, məsciddə yuyanda ayıldı"

Milli Qəhrəman Çingiz Mustafayevlə birlikdə 1992-ci il fevralın 25-dən 26-na keçən gecə Xocalı qətliamını bütün dünyaya çatdırmaq üçün əlindən gələni edən Əsəd Fərəcovun danışdıqları sosial media istifadəçilərini dərindən sarsıdıb.

GoldNews.az xəbər verir ki, Çingiz Mustafayevlə birlikdə Xocalıda çəkiliş aparan Əsəd Fərəcovu hər kəsi Milli Qəhrəman Çingiz Mustafayevin videolarında "Bunu da çək! Bunu da!" deyən şəxs kimi tanıyır. Onu o qanlı fotolardan, videolardan qiyabi də olsa, tanımayan yoxdu. O, faciənin səhərisi başına gələnləri belə nəql edirdi:

"Çingiz Xocalını çəkəndə mənim fonda səsim gəlir. Deyirdim ki, Çingiz onu çək, bunu da çək. Uşaq meyitlərini orada qoya bilməzdik. jurnalistlər hamısını çəkirdi. Bu məqamda donmuş uşağı anasından ayırdım. Uşaq iki gün olardı ki, ölmüş anasının qucağında Xocalıda qalmışdı. Sonra meyitləri götürüb məscidə apadıq. Ağdamda qonaq evi deyilən yer var idi. Orada başımı qolumun üstünə qoyub oturmuşdum. Xocalıdakı dəhşətləri xatırlayıb ağlayırdım. Birdə gördüm ki, kimsə əlimdən öpür. Gözümü açdım ki, Ağdamın axundudur. Mənə dedi ki, gətirdiyin uşağı məsciddə yuyanda ayıldı. Sən demə uşağı isti su ilə yuyanda ağlayıb və oyanıb. O zaman həmin uşağın 2-3 yaşı olardı. O uşaq indi də yaşayır. Ancaq mən onu tanımıram, o da məni".