"Damla ilə yaxın dost olsaq da..." - Yeni klipini təqdim edən Nurayla MÜSAHİBƏ
Son zamanların ən çox dinlənilən müğənnisi Nuray Məhərov yeni klipini sevənlərinə təqdim edib.
Azərbaycan səhnəsində özünün xüsusi səs tonu ilə seçilən Nuray "Bir gün" adlı klipi ilə bağlı ən maraqlı məqamları GoldNews.Az saytı ilə bölüşüb. Müğənni saytımıza verdiyi açıqlamasında bildirib ki, bu mahnısına klipi Elvin Əhmədoğluçəkib:
- Klipi Elvin Əhmədoğlunun komandası ilə birlikdə çəkdik. Çəkiliş 10 fərqli məkanda baş tutdu. Çəkiliş prosesi 3 gün davam etdi. Pianoçum və menecerim istər çəkiliş zamanı, istərsə də yaradıcılığa başladığım ilk illərdən yanımda olan Telman Həsənov da çəkilişlərdə iştirak etdi. Təqdimat mərasimi "JW Marriott Absheron Baku" otelində baş tutdu.
- Nuray, bəs, bu cür keyfiyyətli ekran işinin ərsəyə gəlməsi üçün nə qədər xərc çəkdiz?
- Əslində, məbləği açıqlamaq istəmirəm. Çünki maliyyə məsələlərindən danışmağı sevmirəm. Əsas odur ki, bəyəndiyim bir klip ərsəyə gəldi.
- Bəs, klipiniz üçün keçirdiyiniz təqdimata gəlməyənlər, gözünüzü yolda qoyan dostlarınız oldumu?
- Mən şou-biznesdə demək olar ki, hamını çağırdım. Böyüklük edərək münasibətim olmayan məşhurları belə dəvət etdim. Heç bir müğənni ilə bir problemim yoxdur. Gələn də oldu, gəlməyən də. Günay İbrahimli gəldi, Dj Roshka məni tək qoymadı, Vasif Əzimov, prodüsser Tolik, Təranə Səmədova iştirak etdi. Məsələnin bir tərəfi də var ki, gəlməyənlər də oldu.
- Növbəti klip hansı mahnıya gözlənilir?
- Hazırda yeni bir mahnı üzərində çalışırıq. Klip çəkilişi üçün vaxtımız bir az məhduddur deyə, ikisini eyni zamanda təqdim edəcəyəm. "Bir gün" klipinin təqdimatı təzəlikcə baş tutdu deyə yeni işim üçün uzun müddətin keçməyini gözləməyəcəyəm.
- Nuray, mahnıların bu qədər çox izlənilir və son günlər gündəmdən düşmək bilmirsən. Bu fürsətdən istifadə edib konsert vermək istəmirsən?
- Tezliklə açıq və qapalı məkanlarda mini konsertlər olacaq. Böyük konsert növbəti ildə Yaşıl Teatrda olacaq. Çünki bu il artıq çatdıra bilmərəm.
- Damla da sənin kimi son zamanların ən çox dinlənilən ifaçılarındandır. Son günlər sosial mediada birlikdə ifa etdiyiniz qısa duet parçasına minlərlə baxış sayı gəlib. Hansısa işbirliyi olacaqmı?
- Damla mənim çox yaxın sənətçi dostumdur. Heyif ki, mənim klip təqdimatıma gələ bilmədi. Özbəkistanda konsertlə bağlı səfərdə olsa da, mənə zəng vuraraq üzrxahlıq etdi. Fikrimizdə birlikdə duet oxumaq olsa da, hələlik öz layihələrimlə bağlı çalışmaq istəyirəm.
Müğənninin "Bir gün" adlı klipini sizə təqdim edirik:
