Bu il Azərbaycanda baş verən qəzalarda ölən uşaqların sayı ŞOKA SALDI

“Bu ilin 11 ayı ərzində Azərbaycanda 1678 yol qəzası qeydə alınıb, 687 nəfər ölüb, 1583 nəfər isə yaralanıb”.

GoldNews.Az xəbər verir ki, bunu “Report”a açıqlamasında Daxili İşlər Nazirliyinin (DİN) Baş Dövlət Yol Polisi İdarəsinin (BDYPİ) İctimaiyyətlə əlaqələr şöbəsinin rəisi, polis polkovniki Kamran Əliyev deyib.

Onun sözlərinə görə, ötən ilin müvafiq dövrü ilə müqayisədə bu ilin 11 ayında hadisələrin sayı 170 fakt, ölənlərin sayı 8 nəfər, yaralananların sayı isə 304 nəfər azalıb: “Hadisələrin 47,3 %-i, yəni 795-i piyadaların vurulması ilə baş verən qəzalardır. Nəticədə 283 piyada həlak olub, 591 nəfər yaralanıb”.

K.Əliyev söyləyib ki, 11 ay ərzində ölkədə qeydə alınan qəzaların 603-ü sürət həddinin aşılmasına görə baş verib: “Nəticədə 305 nəfər həlak olub, 74 nəfər yaralanıb. Ötmə və qarşı hərəkət zolağına çıxma nəticəsində 473 qəza baş verib ki, nəticədə 172 nəfər ölüb, 560 nəfər yaralanıb. Sərxoşluq vəziyyəti ilə bağlı 23 yol qəzası baş verib ki, bu zaman 10 nəfər həlak olub, 70 nəfər ağır yaralanıb. Bu da ümumi qəzaların 1,3 faizini təşkil edib”.

Şöbə rəisi bildirib ki, bu ilin ötən dövründə yol qəzaları zamanı 16 yaşına qədər olan 57 uşaq və yeniyetmə ölüb, 183 nəfər yaralanıb. Bundan başqa, 11 ayda 501 toqquşma hadisəsində 203 nəfər ölüb, 673 nəfər yaralanıb: “Bu il baş verən qəzalar arasında piyadaların vurulması çoxluq təşkil edir. Bu da neçə illərdir ən yüksək göstəricidir. Piyadaların vurulması adətən onlar üçün nəzərdə tutulmayan yollardan keçən zaman baş verir”.

K.Əliyev qeyd edib ki, müvafiq dövrdə Bakı şəhərində 577 qəza olub: “Nəticədə 185 nəfər həlak olub, 497 nəfər yaralanıb. Qəzaların sayı ötən ilin 11 ayı ilə müqayisədə 44 fakt azalıb, ölənlərin sayı 15 fakt artıb, yaralananların sayı isə 143 fakt azalıb”.