Bakıda qız üstündə qan düşdü - 5 nəfər bıçaqlandı

Bakıda qətl törədilib. Yasamal rayonunda qonşusuna küçədə avtomobilini saxlamasını irad tutan paytaxt sakini çoxsaylı bıçaq xəsarətləri ilə qətlə yetirilib. Nizami rayonunda isə kirayə qaldıqları evdə mübahisə edən şəxslər arasında dava olub. Hadisə zamanı 5 nəfər bıçaqlanıb.

Avtomobili saxlamaq üstündə qonşular arasında düşən mübahisə ağır cinayətə səbəb olub. Biri digərinə çoxsaylı bıçaq zərbəsi vuraraq qətlə yetirib.

Hadisə Yasamal rayonu, Xıdır Mustafayev küçəsində qeydə alınıb. 57 yaşlı Vidadi Rzayev aralarında yaranmış mübahisə zəminində qonşusu 47 yaşlı Şahin İsgəndərova bıçaqla 9 dəfə zərbə vurub. Şahin İsgəndərov ağır vəziyyətdə 1 saylı Şəhər Kliniki Xəstəxanasına aparılsa da, onun həyatını xilas etmək mümkün olmayıb. Yasamal rayon hüquq mühafizə orqanlarının əməkdaşları Vidadi Rzayevi saxlayıblar. Hadisə şahidlərinin verdiyi məlumata görə, mərhum Şahin İsgəndərov dəfələrlə qonşusu Vidadi Rzayevə avtomobilini yolda saxlaması ilə bağlı iradını bildirib. Faktla bağlı Yasamal Rayon Prokurorluğunda Cinayət Məcəlləsinin qəsdən adam öldürmə maddəsi ilə cinayət işi başlanıb.

Gecə Nizami rayonunda da ağır cinayət baş verib. Qara Qarayev prospekti 74 ünvanında bir mənzili kirayə götürən şəxslər arasında dava olub. Nəticədə 5 nəfər bıçaqlanıb. Mübahisənin qız üstündə yarandığı deyilir. Bıçaq xəsarətləri alanlar isə 30 yaşlı Əsədova Esmira Telman qızı, 28 yaşlı Mirzəyeva Türkanə Teymur qızı və 31 yaşlı Eyvazov Əfqan Həsrət oğludur. Yaralılar 3 saylı Şəhər Klinik Xəstəxanasına, adı açıqlanmayan daha 2 nəfər isə özəl klinikalardan birinə çatdırılıb.

Hüquq-mühafizə orqanlarından verilən məlumata görə, hadisə ilə əlaqədar bir nəfər saxlanılıb. 5 nəfəri bıçaqlamaqda təqsirləndirilən Yağmur Amanov Türkmənistan vətəndaşıdır.