Bakıda dələduz belə ifşa edildi - FOTO, VİDEO

""Xutor" tərəfdə bir şirkətin həyətindən çıxırdım. Bu adam qəfil geri dönüb, maşına yaxınlaşdı. Gülər üzünə bir az da məzlumluq qatıb şirin dillə dedi ki; "qardaş, mən də şirkətdə işləyirəm... Sürücüyəm, Jalə sularını daşıyıram. Sən də sürənsən, başa düşərsən məni. Yolda qalmışam. Özüm Laçındanam, başına dönüm. Adım Ceyhundur, Artyoma getməliyəm, varsa bir az pul ver, 1-2 manat".

Bu fikirləri özünün sosial şəbəkədəki hesabında jurnalist Orxan Məmmədli yazıb. Onun sözlərinə görə, həmin şəxsə 1 manat verib.

"Amma dedi ki, varsa, əlavə 1 manat da verim. Dedim qardaş, xırda olan budur. Adam minnətdarlıq edib uzaqlaşdı. Mən də əks tərəfə sürdüm. Adam gözdən itəndən sonra maşını döndərib, asta-asta adamın arxasınca sürdüm. Yol boyu qəribə davranışları, bir neçə adama yaxınlaşıb pul istəməkləri şübhələrimi yanıltmamışdı. Ara yollarla düz Karl Marks adlanan ərazidə "Qoşa zapravka" deyilən əraziyə kimi adamı izlədim. Arada maşından bir neçə dəfə Ceyhun deyə səslədim. Bir dəfə də çağıranda bu məni gördü. Özünü itirməyib "hə, başına dönüm" deyib maşına yaxınlaşdı.

Dedim qardaş hanı o 1 manat. Adam hikkəylə əlini cibinə salıb çıxaranda 10 manat çıxdı. Bir də pul mənim əlimdə olanda ayıldı. Əlini bu biri cibinə salıb manatlıqlardan birini mənə uzatdı. Dedi 10 manatımı ver. Adını soruşdum, bir-iki vətənpərvər sual verdim, demədi. Telefonu çıxaranda adam ara yollarla iti addımlarla uzaqlaşmağa başladı. 10 manat da məndə qaldı.

İndiyə qədər belə dələduzların adətən cavan adam olduqlarının şahidi olmuşuq. Amma bu yaşda fırıldaqçılar da az deyil. Bu adamı tapın, gəlib 10 manatını götürsün".

O. Məmmədli əlaqə saxladığımızda onu da əlavə etdi ki, bu statusun silinməsi üçün ona çox sayda müraciətlər edilir.