Azərbaycanlı şagird Kopernik Olimpiadasında qızıl medal qazandı - Fotolar

Azərbaycanı ABŞ-nin Texas ştatının Hyuston şəhərində keçirilən Beynəlxalq Kopernik Olimpiadasında təmsil edən Azərbaycan Britaniya məktəbinin şagirdi Mətanət Mustafayeva təbiət elmləri üzrə qızıl medal qazanıb. “Qafqazinfo” xəbər verir ki, “Global Olympiad Center”in təşkilatçılığı ilə azərbaycanlı şagirdlər ABŞ-nin Hyuston şəhərində keçirilən fizika-astronomiya və təbiət elmləri üzrə Beynəlxalq Kopernik Olimpiadasında böyük uğur əldə ediblər. Olimpiadanın final mərhələsi 5-10 yanvar tarixlərində Rice Universitetində təşkil olunub və dünyanın müxtəlif ölkələrindən təxminən 300 şagird iştirak edib. Azərbaycanlı şagirdlər bu çətin elmi yarışda yüksək nəticələr göstərərək müxtəlif mükafatlar qazanıblar. Ümumilikdə, final mərhələsində Azərbaycanı 18 şagird təmsil edib. Onlardan 4-ü fizika və astronomiya, 14-ü isə təbiət elmləri üzrə mübarizə aparıb. Şagirdlərimiz dünyanın müxtəlif ölkələrindən gələn iştirakçılarla rəqabət apararaq bilik və bacarıqlarını nümayiş etdiriblər. Olimpiada çərçivəsində şagirdlərimiz Rice Universiteti ilə tanış olublar. Onlar Hyustonda yerləşən "Natural Sciences" Muzeyinə baş çəkiblər və NASA-da təşkil olunan xüsusi vorkşopda iştirak ediblər. Şagirdlərimiz burada kiçik raketlər hazırlayıb və ulduzları müşahidə ediblər. NASA-da olan şagirdlərimiz beynəlxalq səviyyəli tanınmış alimlərlə tanış olub və elmi müzakirələr aparıblar. Azərbaycanlı şagirdlərimizin göstərdiyi nəticələr aşağıdakı kimdir: Qızıl Medallar: Ziya Novruzsoy (Yaş kateqoriyası üzrə dünya çempionu) Aylin Aşurlu (Yaş kateqoriyası üzrə dünya çempionu) Mətanət Mustafayeva (Dünya üzrə ikinci yer) Esma Nadirzadə (Dünya üzrə üçüncü yer) Gümüş Medallar: Atilla Musayev Fatimə Əzimova Yusif Yusifli Cəmila Fərəcova Bürünc Medallar: Fərrux Rəhimli Məhəmmədhəsən Əzimov Zəhra Əzimova Mikayil Əhmədbəyli Üzeyir İsrafilzadə Rüstəm Yaradanquliyev Fəxri Fərman: Fərrux Məhərrəmli Xurşudbanu Abbaslı Xədicə Qəhrəmanova İştirak Sertifikatı: İsa İsmayılzadə Qeyd etmək lazımdır ki, azərbaycanlı şagirdlərdən dörd nəfər dünya sıralamasında ən yüksək yerləri qazanıb. Ziya Novruzsoy və Aylin Aşurlu dünya çempionu, Mətanət Mustafayeva dünya üzrə ikinci, Əsma Nadirzadə isə dünya üzrə üçüncü yerə layiq görülüblər. Şagirdlərimiz 13 yanvar tarixində Bakıya geri dönəcəklər. Onları Havalimanında təmtəraqlı qarşılama məraismi gözləyir.