Qurban Qurbanov son günlər gündəmdə olan Əfran və Mahirdən danışdı: "Ulduz xəstəliyinə tutulurlar..."

Azərbaycan Premyer Liqasının 2-ci turunda evdə “İnter”ə minimal hesabla qalib gələn “Qarabağ”ın baş məşqçisi Qurban Qurbanov oyunsonrası mətbuat konfransında jurnalistlərin suallarını cavablandırıb. GoldNews.Az xəbər verir ki, baş məşqçi konfransda sosial media platformalarınnı futbolçulara etdiyi təsirlərdən danışıb.

-Düşünmürsüz ki, Əfran bugünkü qolla özünə gəldi? -Bilmirəm, Əfranı kim tənqid edir. Onlar nədən narazıdılar? Bizdə bu dəb halını alıb. Bir nəfər fikir bildirir, hamı həmin şəxsin üzərinə düşür. Buna normal baxıram. Belə şeylərə fikir verməməliyik. Ola bilər, bundan sonra iki-üç ay sonra qol vursun. Bu gün Əfran komandaya faydalıdı deyə burdadı. Açığı mən sosial şəbəkələrə girmirəm. Yəqin bu sözləri yazanların həmin vaxt kefləri yerində olur (gülür). Yenə deyirəm, bu gün Əfran komandaya faydalı oyunçudu. Keçən mövsümdə bizim üçün bir neçə faydalı qollar vurub. Elə kubokun finalında da meydanda ən yaxşılardan idi. -Mahir Mədətov son vaxtlar formadadı. Onun mətbuatın gündəmində olması sizi narahat ertmir ki? -Fikirləşin, mən futbolçuları oyunlara hazırlamaqla yanaşı, sosial şəbəkədəki fikirlərdən də qorumalıyam. Həmişə çalışıram ki, futbolçularım belə şeylərdən uzaq olsunlar. Futbolçu psixologiyası elədi ki, 99,9 faizi belə hallarda “ulduz xəstəliyi”nə tutulur. Bir çox oyunçu olub ki, şan-şöhrət onların karyerasına ziyan vurub. Bu gün mən Mahirə görə narahatam. “Kopenhagen”lə oyunda qol vurduqdan sonra əvvəlki oyunun 50 faizini oynamadı. Buna görə, gənc oyunçularımızın bu cür reklam olunmasına qarşıyam. Bu cür şeylərin həddi var. Elə ola bilər ki, mən də onlarla fərdi söhbətlərdən yorulum.