Bakıda yeni şəhərsalma layihələri: köhnə binaların sökülməsi və kompensasiya artımı
Bakı şəhərində genişmiqyaslı şəhərsalma layihələri çərçivəsində bir neçə ərazidə köhnə binaların sökülməsi və infrastrukturun yenilənməsi nəzərdə tutulub. Bu proseslər şəhərin 2040-cı ilə qədərki Baş planına uyğun olaraq həyata keçirilir.
Bakıda hansı ərazilərdə söküntü aparılır?
Azərbaycan Qiymətləndiricilər Cəmiyyətinin sədri Vüqar Oruc bildirib ki, ilk mərhələdə Heydər Əliyev və Ziya Bünyadov prospektlərinin kəsişməsində yerləşən tikinti materialları bazarı və ətrafdakı kommersiya obyektləri söküləcək. Eyni zamanda Yasamal, Nərimanov, Nəsimi, Xətai, Sabunçu, Suraxanı və Binəqədi rayonlarında köhnə yaşayış fondunun yenilənməsi üzrə layihələr nəzərdən keçirilir.
Köhnə binaların yerində yeni ictimai məkanlar
Vüqar Orucun sözlərinə görə, Bayıl qəsəbəsi istiqamətində, Mərkəzi parkın genişləndirilməsi zonasına və "Təzəpir" məscidi yaxınlığında artıq yenidənqurma işləri başlanıb. Zərgərpalan küçəsi və ətraf kvartallarda da abadlıq və infrastruktur layihələrinin icrası planlaşdırılır. Mərkəzi hissədə isə Qış parkının genişləndirilməsi və Nizami küçəsi ilə birləşdirilməsi nəzərdə tutulub. Bu layihələr çərçivəsində yeni piyada keçidləri və ictimai məkanlar yaradılacaq.
Yeni tramvay xətti və kompensasiya məbləğləri artırılır
Bundan əlavə, Ceyhun Hacıbəyli küçəsində, "Semashko" kimi tanınan 1 nömrəli Klinik Tibb Mərkəzi ərazisində tramvay xəttinin çəkilişi üçün infrastruktur işləri planlaşdırılır. Ekspert qeyd edib ki, əvvəllər bəzi ərazilərdə kvadratmetrə görə 1500 manat kompensasiya ödənilirdisə, indi bu məbləğ bəzi layihələr üzrə 2700 manata qədər artırılıb.
Qiymətləndiricilər Cəmiyyətinin sədri hesab edir ki, hər bir daşınmaz əmlaka fərdi yanaşma tətbiq edilməli və kompensasiya məbləği vətəndaşlara köhnə yaşayış yerlərinə yaxın yeni mənzil almağa imkan verməlidir. Bu, şəhərin mərkəzi rayonlarından əhalinin köçürülməsinin qarşısını alacaq və sosial-iqtisadi balansın qorunmasına xidmət edəcək.
