Atalarının üzünü qara edən "papa"ların gül balaları - SİYAHI

Xəbər verildiyi kimi, Səfərbərlik və Hərbi Xidmətə Çağırış üzrə Dövlət Xidməti rəisinin müavini Novruzəli Orucov oğlu Rüstəm Orucovun özbaşına hərəkətlərinə görə işdən çıxarılıb.

“GoldNews.Az” bildirir ki, dünən Baş Prokurorluğun yaydığı məlumatda bildirilib ki, 2017-ci il iyulun 3-də Bakı şəhər sakini Rüstəm Orucov sürücülük hüququndan məhrum olunmasına baxmayaraq, idarə etdiyi “BMW” markalı 10-OG-300 dövlət nömrə nişanlı avtomobillə yol hərəkəti qaydalarını pozduğuna görə ona əsaslı irad bildirmiş sürücü Sənan Səmədovun idarə etdiyi marşrut avtobusunu 8 dayanacaq təqib edərək sərnişinlərin narahatlığına və insanlarda vahiməyə səbəb olub, vətəndaşların gözü qarşısında bir qrup şəxslə həmin sürücüyə xəsarətlər yetirərək xuliqanlıq edib.

Faktla bağlı 2017-ci il 4 iyul tarixdə Binəqədi rayon Polis İdarəsinin İstintaq Şöbəsində Cinayət Məcəlləsinin 221.2.1 -ci (bir qrup şəxs tərəfindən xuliqanlıq) maddəsi ilə cinayət işi başlanıb.

R.Orucov həmin maddə ilə ittiham olunaraq barəsində məhkəmənin qərarı ilə həbs qətimkan tədbiri seçilib. Hazırda iş üzrə cinayəti törətməkdə təqsiri olan digər şəxslərin məsuliyyətə cəlb olunmaları istiqamətində zəruri istintaq-əməliyyat tədbirləri davam etdirilir.

Xatırladaq ki, Rüstəm Orucov piyadanın ölümünə səbəb olan yol-nəqliyyat hadisəsi törədib, hadisə yerindən qaçdığı üçün hələ 2014-cü ildə 4 il müddətinə azadlıqdan məhrum olunub, 2016-cı ildə isə şərti olaraq vaxtından əvvəl azad edilib. Xuliqanlıq hadisəsi də məhz onun şərti azadlıqda olduğu dövrdə baş verib.

Ümumiyyətlə, Azərbaycanda yüksək vəzifə tutan bəzi məmur, general və oliqarxların övladlarının özbaşınalığı bir sıra hallarda o həddə çatır ki, ölkə başçısı bununla bağlı tədbir görmək məcburiyyətində qalır. Əksər hallarda həmin məmurlara əvvələr edilən xəbərdarlıqlar harınlığı əngəlləyə bilmədiyindən sonda onlar övladlarının güdazına gedərək, vəzifədən qovulurlar.

Dövlət rəhbəri bir neçə çıxışında bəzi məmurları məhz övladlarının xoşagəlməz hərəkətlərinə diqqət etməyə çağırıb.Ölkə başçısı vəzifəli şəxslərdən cəmiyyətdə özlərini apara bilməyən övladları barədə ölçü götürməyi tələb edib.

İlham Əliyev çıxışlarının birində deyib ki, “kim onlara bu statusu verib cəmiyyətdə? Onların, necə deyərlər, güvəndiyi adamları mən təyin eləmişəm vəzifəyə. Mən də çıxardacağam, lazım bildikdə. Bir də bilsəm ki, kiminsə ailə üzvü haradasa xuliqanlıq eləyir, nadanlıq eləyir, özünü apara bilmir, o adam həbs ediləcək, atası işdən qovulacaq”.

N.Orucovla bağlı da məhz belə oldu. Ölkə başçısının sərəncamı ilə Səfərbərlik və Hərbi Xidmətə Çağırış üzrə Dövlət Xidməti rəisinin müavini vəzifəsindən azad edildi, onun avtoxuliqanlıq edən oğlu isə həbs olundu.

İndiyədək oxşar aqibəti yaşayan bəzi məmurları xatırlayaq:

1 – Vergilər Nazirliyinin 14 saylı Ərazi Vergilər İdarəsinin rəisi olmuş Fəxrəddin Əliyev oğlu Məhərrəm Əliyevin qanunsuz davranışlarının güdazına gedib. Belə ki, 2015-ci il dekabrın 21-də saat 23.00 radələrində Qaradağ rayonunun Lökbatan qəsəbə sakinləri Ədalət Həsənov, oğlu Orxan, Mehrab Əliyev, Cəmil Həmidov, Nazim Kərimov və Rafiq Kərimovla mübahisə etdikdən sonra M.Əliyev “Vinçestr” markalı tüfəngdən atəş açaraq onlara müxtəlif dərəcəli bədən xəsarəti yetirib, hadisə yerini tərk edib. Faktla bağlı Qaradağ rayon prokurorluğunda Cinayət Məcəlləsinin 29, 120.2.7-ci (iki və ya daha çox şəxsi qəsdən öldürməyə cəhd) və 221.1 (xuliqanlıq) maddələri ilə cinayət işi başlanıb.Həyata keçirilən tədbirlər nəticəsində hadisəni törədən Məhərrəm Əliyev və Samir adlı yoldaşı tutulub. Bundan sonra atası F.Əliyev məlum hadisə ilə bağlı tutduğu vəzifədən azad edilib.

2 – Gəncədəki 2 saylı dövlət notariat kontorunun dövlət notariusu Nəsib İmanov da oğlu Vasif İmanova görə problem yaşayıb. Belə ki, 2013-cü il iyulun 30-da Gəncə şəhər Baş Polis İdarəsinin iki əməkdaşı polis nəfərləri Zaur Yusibov və Azər Qarayev Hacıkənd qəsəbəsində, yol polisi əməkdaşları ilə birgə sərxoş sürücülərin aşkarlanması istiqamətində tədbirlər həyata keçirən zaman, “VAZ 2107” markalı, 90 MZ 039 dövlət nömrə ni şanlı avtomobilə “Saxla!” işarəsi veriblər. Avtomobildən düşən, 1993-cü il təvəllüdlü, Azərbaycan İqtisad Universitetin 4-cü kurs tələbəsi Vasif İmanov sərxoş vəziyyətdə polis əməkdaşlarını söyüb. Polis əməkdaşları 20 yaşlı gənci nizam-intizama dəvət etmək istəyərkən gənc onlara müxtəlif bədən xəsarətləri yetirib. Faktla bağlı Gəncə şəhər Prokurorluğunda araşdırma aparılıb.Nəticədə hadisəni törədən şəxs tutulub.

3 – Övladının yol verdiyi nöqsana görə vəzifəsində azad olunan məmurlardan biri də sabiq əmək və əhalinin sosial müdafiəsi naziri Füzuli Ələkbərovdur. 2013-cü ilin yanvar ayında oğlu Vüqar Ələkbərovla İsmayıllı sakinləri arasında yaranan insident sonra da həmin rayonda böyük etirazlara səbəb oldu.

Mətbuatda “İsmayıllı hadisələri” kimi işıqlandırılan bu hadisə zamanı eks-nazirin oğluna məxsus “Çıraq” oteli və onun bir neçə bahal avtomobili yandırılıb. Nazirin həmin rayonun icra başçısı olan qardaşı Nizami Ələkbərov da bu hadisələrdən sonra tutduğu vəzifədən azad olundu. Eyni zamanda Füzuli Ələkbərovun özü də “vuruldu”.

4 – Xəzər Dəniz Gəmiçiliyinin sabiq rəis müavini Mübariz Mədətovun oğlu Xalid Mədətov da atasının işdən qovulmasına səbəb olan övladlardandır.

Xalid Mədətov 3 il əvvəl sərxoş vəziyyətdə “Galendewagen” markalı avtomobili ilə qəza törədib. Qəza nəticəsində tarzən Ağasəlim Abdullayevin həyat yoldaşı və nəvəsi dünyasını dəyişib. Bakı Ağır Cinayətlər Məhkəməsinin hökmü ilə Xalid Mədətov 12 il müddətinə azadlıqdan məhrum edilib və cəzasının 3 ilini çəkib. O, prezident İlham Əliyevin 16.03.2017-ci ildə imzaladığı əfv sərəncamı ilə azadlığa buraxılıb. Qeyd edək ki, bu hadisədən sonra Mübariz Mədətov vəzifəsindən kənarlaşdırılmışdı.

Göründüyü kimi, Novruzəli Orucov oğlunun özbaşına davranışlarının cəzasını çəkən ilk məmur ata deyil. Bəs sonuncu olacaqmı? Bu suala cavab vermək çətindir.Yaşayarıq, görərik.

Onu da deyək ki, dünən Nazirlər Kabinetinin 2017-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunan iclasda ölkə başçısı növbəti dəfə dövlət məmurlarının davranış qaydalarına əməl etməsi məsələsinə toxunub.Prezident deyib ki, dövlət məmurları və onların ailə üzvlərinin davranış normalarına ciddi əməl etməlidirlər. Dövlət başçısı xalqa xidmət, təvazökarlıq, təkəbbürlü davranmamaq prinsiplərinin dövlət məmurlarının əsas həyat və fəaliyyət normasına çevrilməsinin zəruriliyini vurğulayıb.Prezident bu məsələdə heç kimə güzəştin olunmadığını və bundan hamının nəticə çıxarmalı olduğunu bildirib.

“Unikal” qəzeti