AAYDA Bəşir Səfəroğlu küçəsində səkilərin enli olmasına aydınlıq gətirdi - FOTO

Azərbaycan Avtomobil Yolları Dövlət Agentliyi (AAYDA) Bakının Yasamal rayonu ərazisində hazırda təmir işləri aparılan Bəşir Səfəroğlu küçəsindəki səkilərin enli olmasına münasibət bildirib.

Agentliyin Mətbuat xidmətinin rəhbəri Anar Nəcəfli Goldnews.az-a açıqlamasında bildirib ki, hazırda təmir işləri aparılan Bəşir Səfəroğlu küçəsi müasir üsulla, şəhər infrastrukturu layihəsi əsasında tam müasir formada abadlaşdırılır:

“Həmin ərazidə təmir işlərinin Bakı Şəhər İcra Hakimiyyətinin sifarişi əsasında aparıldığına görə işlər həmin qurumun hazırladığı layihə üzrə həyata keçirilir. Orda tam müasir formada şəhər küçəsinin olması nəzərdə tutulub. Eyni zamanda, küçədə sürücülərlə yanaşı, piyadaların da hərəkətinin təhlükəsizliyinin təmin olunması üçün piyada səkiləri qurulub. Əvvəllər həmin küçədə səki heç vaxt olmayıb və sürücülər avtomobillərini küçədə saxlayırdılar. Bu da piyadaların təhlükəsizliyinə mane olurdu. Həmçinin, bəzən elə olurdu ki, piyadaların hərəkəti mümkünsüz vəziyyətə çevrilirdi. Hazırda küçədə piyadaların rahat şəkildə hərəkəti üçün şərait yaradılır. Küçə yol boyu sakinlərin evlərinin darvazalarının qarşısıdır. Bəzən də sürücülərin avtomobillərini düzgün park edə bilməməsi səbəbindən sakinlər öz həyətlərindən çıxa bilmirdi. Ona görə də sakinlər öz darvazalarınının qarşısını dəmir zəncirlərlə hasarlayırdılar ki, kimsə burada avtomobil saxlamasın. Həmin küçə nəqliyyat vasitələrinin hərəkəti üçün birtərəflidir. Əvvəl də belə olub”.

Qeyd edək ki, Bəşir Səfəroğlu küçəsi paytaxtın Nizami küçəsi ilə “Qış parkı”nı birləşdirən müasir görünüşlü şəhər küçəsi olacağı planlaşdırılır.