Ermənistan qaz qiymətləri ilə bağlı yeni mövqe açıqladı
Ermənistanın Baş naziri Nikol Paşinyan Qarni şəhərində keçirilən seçkiqabağı görüşdə ölkəsinin iqtisadi gələcəyi ilə bağlı iddialı açıqlama verib. Paşinyan bildirib ki, Ermənistanın qaz qiymətlərindən qorxmağa ehtiyacı yoxdur, çünki yaxın illərdə ölkənin iqtisadi durumu xeyli yaxşılaşacaq.
Paşinyan: «Ermənistan o qədər varlanacaq ki, qiymətlər bizə təsir etməyəcək»
Baş nazir çıxışında qeyd edib: «Ermənistanı yüksək qiymətlərlə qorxutmaq mənasızdır. Bizim o qədər çox pulumuz olacaq ki, heç bir bahalıq bizə təsir etməyəcək», - deyə vurğulayıb.
Moskva ilə gərginlik fonunda qəti mövqe
Xatırladaq ki, son günlər Rusiya Xarici İşlər Nazirliyinin rəsmi nümayəndəsi Mariya Zaxarova, Ermənistanın Avropa İttifaqına inteqrasiya kursunu davam etdirməsi halında, Moskvanın qaz və neft tədarükünü dayandırmağa hazır olduğunu bəyan etmişdi. Paşinyanın bu açıqlaması isə rəsmi İrəvanın iqtisadi müstəqillik və siyasi xəttində israrlı olduğunu göstərir.