Masallıda dəhşətli qətl hadisəsi baş verib.
GolNews.az xəbər verir ki, hadisə rayonun Miyenkü kəndində qeydə alınıb. Kənd sakini, 28 yaşlı Azər Ağayev arvadı Asudə Ağayeva ilə birlikdə ailə-məişət münaqişəsi zəminində 55 yaşlı Etibar Ağayev və Rəfiqə Ağayevanı balta ilə öldürərək həyətlərindəki tövlədə basdırıblar və üzərini betonla örtüblər. Hadisə iyunun 5-də baş verib. Azər Ağayev o vaxtdan yoxa çıxan ər və arvadı soruşanlara valideynlərinin Rusiyaya yollandığını deyib. Yaxınlarının təkidindən sonra hadisəni törədən şəxs valideynlərinin itməsi barədə polisə məlumat verib. Masallı polisinin araşdırmaları nəticəsində məlum olub ki, evdə yaranan münaqişədən sonra oğul və gəlin onları balta ilə qətlə yetirib. Azər və Asudə izi itirmək məqsədi ilə meyitləri həyətlərindəki tövlədə qazdıqları çalada basdırıblar. Daha sonra onlar çalanın qazıldığı yeri betonlayıblar.
Faktın üstü açıldıqdan sonra hər iki meyit basdırıldığı yerdən çıxarılaraq Səhiyyə Nazirliyi Məhkəmə Tibbi Ekspertiza və Patoloji Anatomiya Birliyinin Lənkəran rayonlararası şöbəsinə aparılıb. Qətli törədən şəxslər tutularaq istintaqa təhvil verilib. Qeyd edək ki, hadisəni törədən ər və arvadın üç azyaşlı qız övladı var.
Faktla bağlı Masallı rayon prokurorluğunda araşdırma aparılır.
APA TV