Dünyanı gəzməklə müxtəlif mədəniyyətlərlə tanış olmaq əla ola bilər, amma bundan daha möhtəşəm bir şey varsa, o da festival zamanları ilə səfərlərin üst-üstə düşməsidir.
GoldNews.Az olaraq bu yazımızda sizinlə dünyanın ən maraqlı festivallarına səfərə çıxacağıq.
Holi Festivalı
Harada: Hindistan, Nepal, Şri-Lanka
Nə zaman : 6 mart
Bu festival yuxarıda adıçəkilən ölkələr üçün turistləri cəlb etməyin ən önəmli fürsətidir. Hindistanın hər yerində qeyd edilən Holi bayramı qədim dövrlərdən bəri keçirilir. Festival zamanı hər kəs bir-birinə rəngli boyalar ataraq rəqs edir.
Pingxi Kandil (Lantern) Festivalı
Harada: Tayvan, Pingxi
Nə zaman: 27 fevral
Sehirli məkanları bəyənirsinizsə, bu festival tam sizə görədir. Minlərlə arzu şarının eyni anda havada süzməsini izləmək və öz şarınızı da arzu tutaraq göy üzünə buraxmaq füsunkardır. Bu festival eyni zamanda Amerikada "Rise" adı altında keçirilir.
Oktoberfest
Harada: Münhen, Almaniya
Nə zaman: 19 sentyabr - 4 oktyabr
Oktyabr festivalı hər il Münhendə sentyabrın sonu və oktyabr ayı arasındakı 2 həftədə qeyd olunur. Pivə və yeməklərin bol-bol istifadə edildiyi festivala dünyanın hər yerindən hər il 6 milyona yaxın insan qatılır.
Venesiya Karnavalı
Harada: Venesiya, İtaliya
Nə zaman: 31 yanvar - 17 fevral
Dünyanın ən uzun maska festivallarından olan Venesiya karnavalı XIII əsrdən bəri hər il qeyd olunur. Keçmiş zaman geyimləri və maskalarla insanlar İtaliya küçələrində bolluca əylənirlər.
Harbin Buz və Qar festivalı
Harada: Harbin, Çin
Nə zaman: 5 yanvar - 25 fevral
Şimal-qərbi Çində yerləşən Harbin şəhərində hər il qardan və buzdan düzəldilmiş heykəllərin nümayiş olunduğu festival xüsusilə qaranlığın düşməsi ilə möhtəşəm mənzərəyə bürünür. Olduqca soyuq olan şəhərdə buz otellərdə qala bilərsiniz.
Rio Karnavalı
Harada: Rio-de-Janeyro, Braziliya
Nə zaman: 13-17 fevral
Rio karnavalı dünyanın ən tanınmış festivallarındandır. Yuxarıdakı zaman kəsiyində hər axşam 2 milyon insanla birlikdə xüsusi kostyum geyinmiş rəqqasələr rəqs edir və onları əylədirirlər.
Dia de los Muertos (Ölülər Günü)
Harada: Oaxaca, Meksika
Nə zaman: 31 oktyabr
Ölüləri anma festivalı Latın Amerikası ölkələrində və xüsusilə Meksikada böyük coşğu ilə qarşılanır. Geyilən skelet və quru başlı kostyumlar ölüləri simvolizə edir.
La Tomatina
Harada: Bunol, Valensiya, İspaniya
Nə zaman: 27 avqust
Hər il avqustun son çərşənbə günündə təşkil olunan festivalda insanlar əylənmək üçün bir-birinə pomidor atırlar. Pomidorlar atılmamışdan öncə zərər verməsin deyə əzilir və bir qisim tərəvəz festival üçün xüsusi olaraq yetişdirilir.
Albuquerque şar festivalı
Harada: Albuquerque, Nyu-Mexiko, ABŞ
Nə zaman: 2-10 oktyabr
Hər il oktyabr ayında 9 gün boyunca davam edən festival dünyanın ən məşhur yığıncaqlarındandır. Eyni anda minlərlə şar havaya buraxılır.
Boryeong Palçıq festivalı
Harada: Boryeong, Cənubi Koreya
Nə zaman: 18-27 iyul
Tamamilə əyləncə məqsədi ilə təşkil olunan festivalda palçıq baş roldadır. İnsanlar palçıqda güləşməkdən üzməyə qədər bir çox fəaliyyətlərlə məşğul olurlar. Axşam isə çimərlikdə mahnı və diskoteka turistləri əyləndirir.